A popular Sant Silvestre de Teruel fa a suya XXIII edición

Continarán os cambios de l'anyo pasau, prencipiando antis y con menos metros de recorriu d'a preba

cartelO venient 31 d’aviento se ferá a XXIII Sant Silvestre en Teruel, un evento que cada anyada arrocla a más participants, y que en ista edición contina con as novedatz que bi habió l’anyada pasada ta que más chent pueda participar-ie.

O prencipio d’a preba continará, alavez, a las 19:00 ta que pueda correr a chent que antismas no lo feba en rematar masiau tardi. Antimás, no se convocan categorías y os ganadors masculino y femenino se levarán a tradicional cesta de Nadal. Tamién bi habrá premios t’os disbraces más orichinals y a familia con más miembros participando en a corrida.

D’atra man, y en estar una preba más que más popular, a distancia se baixó l’anyo pasau, dende os 4.800 metros dica los 3.600, en considerar-se masiada t’a mas gran parti d’os participants. Como referencia, o concello remera que a distancia d’a corrida popular ye de 3.800 metros. Se ferán dos vueltas a un circuito de bells 1.800 metros, o mesmo que en anyadas anteriors, pero sacando-ne a parti que iba por a carrera Sant Fernando y Fernando Hué, una zona fosca y poco transitada, y que antimás feba problemas de circulación ya que caleba tallar o trafico. Os participants d’a corrida podrá fer servir os vestuarios y duchas d’a piscina climatizada.

Ta participar-ie no cal fer inscripción. Nomás cal estar-se en a zona de salida antis d’as 19. Dende a Concellería d’Esportes qui organizan l’evento de conchunta con a CAI, han animau “a totz os teruelanos a rematar l’anyada d’a millor traza posible: fendo esporte”. Tamién han remerau as cifras de participants que han puyau a-saber-lo en as zaguers anyadas, pasando de 275 en 2008 a 676 en 2012.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.