A presidenta Rudi se trobará con os sindicatos d’os miners en ista semana

A oposición critica que Rudi siga más pendient d'as formas que d'as solucions

Rudi, segundos antis d'a comparecencia especial (Foto: Gobierno)

Rudi, segundos antis d'a comparecencia especial (Foto: Gobierno)

A presidenta d’o Gubierno, Luisa Fernanda Rudi, ha anunciau que en ista semana se trobará con ripresentants d’os miners aragoneses, dimpués que as dos central sindicals más grans, haigan demandau ista trobada. En una comparecencia especial Rudi ha esplanicau que o suyo gubierno no concederá aduyas a o sector minero porque “a comunidat no tien capacidat y amás Europa no lo premite”. Encara asinas, Rudi ha amostrau a suya voluntat de trobar-se con os miners “en que l’achenda lo premita”. Tamién ha sinyalau que l’executivo estudiará bell plan de reactivación ta las redoladas mineras, pero sin aduyas directas.

A presidenta ha reclamau tamién respeto a las institucions, dimpués d’os incidents d’a zaguera semana, y ha dito que “s’ha d’asperar a que s’apreben os presupuestos de l’estau ta veyer como afectan os retalles a la minería aragonesa”. Rudi ha expresau que “o dialogo ye un sinyal d’actuación d’o mio gubierno” y que s’han de rispetar as opinions y ideyas d’os atros, asinas como la “inviolabilidat d’os Parlaments”. Hue, a presidenta s’ha trobau con o lider d’a oposición, o socialista Javier Lambán y con ripresentants de UGT, CCOO, CREA y Cepyme-Aragón.

Dende la oposición, o vocero d’o PSOE, Javier Sada, ha manifestau que no ye “custión d’esfender actitutz violentas, pero lo que más mos fa son os problemas d’os miners y as cuencas mineras”. Seguntes Sada, os problemas d’os ciudadans son más importants “que no os d’os diputaus”, y s’ha amostrau contrario a viedar a dentrada en bellas circunstancias en o recinto parlamentario.

Tamién Nieves Ibeas, de CHA, ha criticau o discurso de Rudi por “estar más pendient d’as formas que d’as solucions”. Seguntes Ibeas, “as protestas han dispertau a la presidenta que ha feito una comparecencia publica ta demandar un rispeto que ni ella ni o gubierno han teniu enta o sector ta trobar-ne una solución”. Dende o PAR, Alfredo Boné ha resaltau que os incidents d’o diya 7 no se pueden “achacar a os miners ni a las cuencas” y s’ha mostrau partidario de trobar una solución dende o dialogo y o rispeto, y evitando más problemas como os ocurrius o zaguer 7 de chunio. O diputau de IU por Teruel, Luis Ángel Romero, ha reclamau a o gubierno midas ta continar o proceso de reindustralización d’una zona afectada por a cayita d’as aduyas t’o carbon y o trancamient d’a central termica d’Escucha. Romero ha denunciau que os fundos d’o Miner no han estau prou ta diversificar a economía d’a redolada.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.