A prima de risque espanyola de nuevas en 550 en puertas d’a tuca d’a Eurozona

Hue y maitín se torna a decidir o futuro d'a economía d'a eurozona, en meyo d'una firme presión d'os mercaus

Ye una nueva tuca historica, como ya van a-saber-las, pero os achents que manullan os mercaus no tienen garra intinción de deixar de fer presión sobre Europa en cheneral y Espanya en particular antis de que se prenga bella decisión. Con o rescate ta la banca espanyola de fundo, que ahiere tenió un episodio más con a nacionalización total d’os toxicos de Bankia, a prima de risque espanyola ha tornau a puyar enta os 550 puntos basicos, y o tipo d’intrés d’a deuda espanyola tamién puya dillá d’o 7%. Son uns numeros que deixan a deuda publica espanyola de nuevas amán de salir d’os mercaus por ixos tipos d’intrés tan alteros, lo que fería imposible que l’estau espanyol podese financiar-se.

En meyo d’ista unatra vegada cerenya presión, a tuca europeya se torna alazetal ta la economía espanyola. Se charrará de nuevas d’as condicions d’o rescate d’a banca espanyola, pero tamién d’una mayor integración economomica, fiscal y bancaria entre totz os paises miembros ta privar a presión d’o mercau sobre os estaus. De feito, un d’os caballos de batalla ye a creyación d’eurobonos europeyos ta o mercau de deuda, cosa a la que Alemania, que ye qui marca o camín d’os pres d’a deuda soberana, no ye disposada a acceptar.

Por primer vegada, tamién dende fa meses, a tuca charrará sobre creiximiento. O president francés, Hollande, quiere alportar una achuga por deixar d’un costau tantos retalles y fer un paquet d’aduyas ta empentar o creiximiento d’0s paises d’a eurozona. A tuca, refrendará as midas que sinyoron a zaguera semana Alemania, Espanya, Francia y Italia que suposarán una buena quantidat de diners ta empentar l’estimulo economico y mesmo la creyación d’una tasa ta las transaccions financieras como mida de financiar istas aduyas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.