A principal entidat en esfensa d’o galés diz que a luenga “concara una crisi”

Cymdeithas considera que a cayida d'a luenga en totz os condaus de l'oeste ya ta fer-se-ne muito.

Protesta contra a rotulación nomás en anglés en Galas (Foto: Wikipedia)

Protesta contra a rotulación nomás en anglés en Galas (Foto: Wikipedia)

L’asociación proluenga galesa Cymdeithas considera que “o galés concara una crisi“. Ye una d’as principals conclusions que ha entidat ha feito d’os resultaus d’o censo de 2011 que se presentó o lunes. Seguntes istos datos, o galés ye charrau por 562.000 personas de tres anyadas u más, una baixada debant d’os 576.000 que lo charraban fa diez anyadas. A perda equivale a dos puntos percentuals d’a población d’o país (d’o 21% de 2001 t’o 19% d’agora) y amana a o galés a o suyo porcentache historico más baixo (en 1991, quan a luenga yera charrada por 500.000 personas, o 18,5%).

A noticia ye estada un trucazo furo t’a planificación lingüistica en Galas, más que más dimpués de que o gubierno galés hese estau decindo que l’obchetivo yera puyar o numer de charradors d’a luenga en un 5% mientres a decada pasada. Agora que se conoixen os resultaus d’o censo, o gubierno preba d’aconortar-se decindo que “o futuro d’a luenga galesa ye en os ninos y en a chent choven”. O censo diz que o 33,7 % d’os ninos d’entre 3 y 9 anyadas charran galés, una cifra que plega dica o 35,5 % entre os que tienen entre 10 y 19 anyadas. Manimenos, entre as edatz de 20 y 29 anyadas baixa dica un 17%.

“Mientres as zaguers diez anyadas, [o gubierno] no ha refirmau tot lo que caleba a la luenga galesa”, ha dito o president de Cymdeithas, Robin Farrar, ta qui “o pueblo de Galas refirma muito a nuestra luenga, pero o gubierno no tien tanta ambición”.

As perdas en l’oeste, “motivo de gran preocupación”

Cymdeithas ye muito critica con a situación en os baluartes occidentals d’o galés. O censo amuestra que en Ceredigion, os charradors d’a luenga han cayiu por debaixo d’o 50% (yeran o 52% fa diez anyadas, y agora son o 47,3%), o mesmo que pasa en Carmathenshire (d’o 50,3% t’o 43,9%).  “A baixada en totz os condaus de l’oeste ye motivo de ta fer-se-ne muito“, diz Farrar, qui considera que s’habrían de concarar afers economicos: “Cal un renaiximiento economico, a ran local, en as arias a on que tradicionalment charran galés, si ye que queremos revertir a baixada y guaranciar un futuro sostenible t’o galés en Galas”.

Fuent: http://www.nationalia.cat/ca/noticies/1287

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.