A programación d’a sala King Kong se levará t’o Centro Civico Almozara

A mitica sala zaragozana no podió ubrir as suyas puertas o pasau cabo de semana por un boicot d'os vecins

cartelA programación de conciertos que heba presto a sala King Kong ta istas fiestas d’o Pilar, a la fin podrá viyer-se en o Centro Civico Almozara de Zaragoza. Asinas lo anunciaba iste lunes un comunicau d’a sala a on que antimás daba las gracias por tot lo refirme que les han feito plegar os aficionaus a la mosica y a la cultura.

A sala, que levaba trancada quince anyadas iba a ubrir as suyas puertas iste chueves en una devantadera con sesions de DJs. O viernes yera programau antimás un concierto d’a colla Triángulo de amor bizarro. Totz dos actos habioron de suspender-se en meter una cleta os vecins d’a sala debant d’un callizo por a on que ye a salida d’emerchencia d’a King Kong.

Dende a King Kong, han declarau que “continan treballando ta reubrir antis con antis y mantener a programación prevista, ya siga en la King Kong u en atros espacios d’a ciudat”. En o comunicau han dito sentir-se en deuda “con totz y todas vusatras” y consideran que “lo minimo que pueden fer ye continar con la programación que tenebanos ta Pilars“. “Tos mereixetz isto y muito más”, i adhiben.

Asinas, a programación mosical que tendrá o Centro Civico Almozara prencipiará o miercols 9 con as collas Balmorhea y JBM, plegadas dende Estaus Unius y Canada. Continará con Cápsula o chueves 10 y Estereotypo o diya 11, ta rematar con os catalans Manel que zarrarán la programación o diya 12.

King Kong “aspera trasladar ta l’Almozara l’esprito King Kong y, prou que sí, compartir-lo con totz y todas vusatras”, remata o comunicau.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.