A programación d’os “Pilars” se va conoixendo entre polemicas por as contratacions d’o concello

Os actors y actrices de Oregón TV serán qui fayan o pregón d'as fiestas zaragozanas

cartelfiestasA poco más de dos semanas ta que escompencipien as fiestas de Zaragoza, ya se van conoixendo muitos d’os actos culturals y d’a programación que ufrirá la ciudat mientres ixos diyas. Tamién s’ha puesto conoixer iste martes o nombre d’os nuevos pregoners d’as fiestas: serán l’equipo responsable de Oregón TV, programa d’humor d’Aragón TV, a televisión publica.

O lunes se feba publica a programación d’a Carpa d’o ternasco d’Aragón que, igual como l’anyo pasau prencipiará os Pilars una semana antis y tendrá toda la programación feita por collas y artistas aragoneses. O primer cabo de semana, d’o 27 t’o 29 de setiembre, o folk centrará o cartel con as actuacions de La Orquestina del Fabirol, Gordobordón, La Compañia de Chesús, Lurte, y La truqueta folk band. A programación de Pilars s’imple con mosica y actuacions de toda mena. Prencipiará o chueves 3 con Los Gandules y bi habrá un festival d’os 80, un homenache a Más Birras, nueitz d’humor con Pepín Banzo, Jaime Ocaña u Juako Malavirgen entre atros, China Chana, Esparatrapo, Los artistas del gremio, Salvatores Stars, collas de tributos a AC/DC, Siniestro Total y Kojón Prieto y los Huajalotes y nueitz de bailes con Vendetta Show y Grupo Cierzo.

A sala Multiusos ha confirmau ya os conciertos de God Save the Queen y Brothers in Band (tributos a Queen y Dire Straits) o diya 4, Loquillo lo 5, Sinead O’Connor con Antílope o 9 y o veterans Hombres G, o diya 11. O CMA Las Armas trayerá a La Húngara y Hamlet os diyas 10 y 12 respectivament.

As salas de conciertos zaragozanas tamién han apostau firme por a programación pilarista. Oasis, Utopía, Creedence, Arena Rock, Juan Sebastian Bar, La Ley Seca, La campana de los perdidos, La lata de bombillas u a nueva sala King Kong, que torna a ubrir as suyas puertas ista semana programan prous conciertos como los de The Whip, Blues juice, Black Peepers, Hillbilly Mongows, Armenian, Neuman, Revolver, Uzzuahia, Maybe Boom, Los Rockets, Stacey Collins, Stereotypo, Triboote Fighters, Ilsen, Despierta McFly, Manel u Pol Pot.

Os conciertos que se fan de baldes en a Plaza d’o Pilar ya son estaus anunciaus en buena parti tamién. Macaco enguerará o scenario lo diya 5, dimpués d’o pregón. Auryn trayerán a suya mosica t’adolescents o diya 11. O 12 se ferá a fiesta d’a Máxima FM y zarrará os Pilars Pablo Alborán o 13.

Polemicas contratacions

O concello antimás ha preso bellas decisions que son resultando prou polemicas cuanto a las contratacions. D’una man o Parking Norte d’a Expo será chestionau por a interpresa Tanricamente S.L. a unica que optaba ta l’achuste antiparti d’a Federación d’Interpeñas. Isto ha causau prou carrenye entre os penyistas, que ferán a suya carpa en Val d’Espartera, no habendo-ie estianyo Espacio Z, por lo que se sabe dica agora.

Tamién ha resultau polemico l’achuste de l‘espacio infantil de chuegos en o Parque Delicias. Dimpués de 25 anyadas chestionau por a Promotora d’Acción Infantil (PAI), en ista edición o concello le’n ha concediu a una Unión Temporal d’Interpresas compuesta por 23Arts, Gaac y Nacho Vilar Producciones. En o casting que feban iste martes t’achustar a los treballadors en o museu Pablo Gargallo, s’han viviu intes de tensión por as protestas contra ista decisión.

Una rispuesta a A programación d’os “Pilars” se va conoixendo entre polemicas por as contratacions d’o concello

  1. Pingback: A programación d’os “Pilars” se va conoixendo entre polemicas por as contratacions d’o concello | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.