A “Quebrantahuesos”, emoción,sacrificio y companyerismo

Iste cabo de semana se celebra a tradicional corrida cicloturista "Quebrantahuesos" en Samianigo que para a Penya Ciclista Edelweiss

Alfredo Gasca Beltrán

Foto: Juan Pablo Frías (CC-BY-SA 3.0)

Foto: Juan Pablo Frías (CC-BY-SA 3.0)

Manyana se celebra en Samianigo a 26ª edición d’a Marcha Cicloturista Internacional a Quebrantahuesos (QH).  Con mas de 11.000 corredors, venius de vintinueu países, prestos pa fer un d’os suyos dos recorrius, a Treparriscos de 90 kms. u a QH de 205 km. As dos con salida y plegada en a capital serrablesa. Ye considerada, prou que sí, a mas important de quantas se fan en o panorama internacional.

Una ripa de chent treballando mientres tot l’anyo pa que iste día siga perfecto y no manque brenca. O día d’a corrida, contan antimás con l’aduya d’os voluntariosL’orden, a limpieza, o montache y desmontache d’os puestos de soministro, o trafico, os puestos d’información, etc.  Todas istas son unas d’as suyas funcions. Qué gran faina fan. Charramos d’a suya labor con Víctor López, miembro d’a Penya A Sala de Samianigo y que dende fa bells anyos, colaboran en o puesto de soministro d’o Somport en Candanchú.

Nos reconta Víctor que ista ye a suya decena QH.  Le demandamos que defina a QH en tres parolas.  De camín contesta, “emoción, sacrificio y companyerismo“.  Me diz tamién con muito argüello que, “lo que mas goi me fa, ye veyer o mío lugar, Samianigo, a rebutir.  Isto no se veye totz os días“.

A “emoción”, la veigo quan me reconta a ripa de ciclistas que pasan por o puesto, “os primers no paran, pero chino-chano, astí paran totz y bi ha un fascal de chent. Y tot ha d’estar presto pa ells”.

O “sacrificio y companyerismo”… pos a veyer.  Si paramos cuenta encara que siga nomás en o feito que aprestan o puesto de soministro pa ueito u nueu mil presonas… yo estoi que ixo lo diz tot y ye prou.
A la fin, como diz Víctor, “ye un día especial y cal vivir-lo y disfrutar-lo“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.