A reforma educativa de Wert reduce l’amostranza en as luengas cooficials

A nueva reforma educativa deixa en una dificil situación en a escuela a las luengas cooficials que pasarían a un quarteno puesto en l'amostranza d'idiomas

O ministro d’Educación espanyol J. Ignacio Wert

L’esbruixallo d’a reforma educativa suposa un tierratremo t’os esferents sistemas d’amostranza de l’Estau espanyol en que i hai luengas cooficials. Una reforma que apunta dreitament sobre o catalán, luenga vehiclar en Catalunya.

Seguntes iste esbruixallo d’a LOMCE (Lei Organica de Millora d’a Calidat Educativa) as asignaturas quedan trestalladas en troncals, especificas y d’especialidat. As troncals ocuparían a lo menos un 50% de l’horario y entre ellas se troba a luenga castellana y a primer luenga extranchera. As especificas ocuparían como muito un 50% de l’horario y entre ellas se troba a segunda luenga extranchera, y as asignaturas d’especialidat no tienen un porcentache especifico, pero variarían entre un maximo d’una, u dos en o caso de que i haiga una luenga cooficial, que sería considerada en ista categoría. Por tanto, as luengas cooficials pasan a estar en o quarteno puesto, un puesto “residual”, seguntes ha comentau a consellera en funcions d’a Generalitat de Catalunya, Irene Rigau.

S’obliga a las autonomías con luenga cooficial a guaranciar “en todas as etapas educativas obligatorias que as luengas cooficials sigan ufiertas en as distintas materias en proporcions equilibradas en o numero d’horas lectivas”. Mientres que no se determinen os porcentaches d’as luengas, os pais pueden trigar en qué luenga vehiclar quieren escolarizar a os suyos fillos y optar por escolarizar-los en centros privaus si no tienen ufierta d’ixa luenga vehiclar en a escuela publica u concertada, pagando l’administración autonomica os gastos d’a escolarización en istos centros en o caso d’o castellano. Os alumnos podrían superar a ESO u o Bachillerato sin examinar-se d’as luengas cooficials, pues podrían trigar atra asignatura d’especialidat que no estase a luenga cooficial.

En Catalunya, o gubierno en funcions de CiU ha advertiu que no piensa aplicar ista reforma en caso d’estar aprebada y que recurrirá a o Tribunal Constitucional. Irene Rigau, consellera d’educación en funcions, ha dito que “garra ministro heba iu tan luen”, mientres que Somescola apunta que “ista lei nos torna ta un pasau predemocratico”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.