A revuelta contra un nuevo gran aeropuerto en Bretanya tensiona o gubierno francés

O desaloixo por a policía d'o campamento contra l'aeropuerto de Notre-Dame-des-Landes (Kernitron-al-Lann) trestalla a la opinión publica y a o partiu socialista

O prochecto de l’aeropuerto internacional d’o Gran Ueste, que habría de construyir-se en a localidat bretona de Kernitron-al-Lann ha escayeixiu en un conflicto politico important t’o gubierno francés. Ista semana a policía ha dentrau en a zona que habría d’ocupar l’aeropuerto a on, dende feba meses s’heba creyau un campamento con voluntarios ta empachar l’encete d’as obras. Os chendarmes s’enfrontinoron a os acampaus y estricalloron parte d’as instalacions, desencadenando una crisi politica que ha afectau a o PSF y a o gubierno de cuchas. Concentracions y manifestacions contra o prochecto s’han espardiu iste cabo de semana por tot l’estau francés mientres collas de voluntarios reconstruyen cabanyas en a selva afectada por as obras.

O viernes, debant d’a presión especialment d’o movimiento ecolochista, o primer ministro francés Jean-Marc Ayrault anunció a creyación d’una comisión de dialogo entre as autoridatz y os acampaus en as selvas y terrenos a on habría de construyir-se o nuevo aeropuerto. A comisión manimenos ha estau recibida con poco entusiasmo por as collas que s’oposan a o prochecto, que consideran que ye solament una operación d’imachen ta maquillar a operación d’a policía.

Entre os opositors a o prochecto i hai una colla d’alcaldes y cargos publicos que en qüestionan a necesidat, o partiu Europa Ecolochía-Os Verdes, que emparó a o gubierno de cuchas y forma parte d’a mayoría que gubierna Bretanya, collas nacionalistas bretonas y una asociación de labradors y ganaders afectaus por o prochecto.

Iste cabo de semana siedes d’o PSF en quantas localidatz han amaneixiu con pintadas contra l’aeropuerto y collas de militants ecolochistas han ocupau concellos y edificios publicos. Bellas voces dentro d’o partiu socialista han criticau os intentos de desaloixo.

L’aeropuerto d’o Gran Ueste ye pensau ta substituyir a l’actual aeropuerto de Nantes y configuraría un nyudo de comunicacions en Bretanya y o ueste de l’estau francés.

Vidio

Fuent: http://www.vilaweb.cat/noticia/4060961/20121202/revolta-gran-aeroport-bretanya-tensiona-govern-frances.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.