A sala Black Note esfiende a programación d’una colla neonazi

Qualques collas, como Arthur Caravan, ya han anunciau que cancelaban os conciertos previstos como muestra de repulsa

blacknoteL’actuación d’a colla neonazi Killer Sorpresa prevista en a sala Black Note de Valencia ha desencadenau criticas de sectors socials, culturals y politicos, que demandan que se suspenda o concierto. En un comunicau, o cherent d’a sala, German Valenzuela, chustifica a programación d’iste concierto decindo: ‘Nos adedicamos a la mosica y nomás a la mosica, sin dentrar en cosas de politiquería‘. Ya i hai bellas collas que, como protesta, han anunciau que cancelaban os suyos conciertos previstos si a sala no cambiaba de pareixer.

‘Vint anyos de conciertos avalan o nuestro compromís con a pluriculturalidat y o nuestro gran refirme a la mosica afro-americana y as artes scenicas en cheneral. Razón por a quala nos adedicamos a la mosica y nomás a la mosica, sin dentrar en politiquería’, diz German Valenzuela, y insiste: ‘As cosas politicas s’han de tractar en atros foros, no ye a nuestra intención incomodar a dengún. A qui lo quiera entender, le’n agradeixemos, y a qui no, lo respectamos’. En o comunicau, penchau en a pachina de Facebook, tamién diz: ‘Os problemas que os politiquers tiengan entre ells, no nos afectan. A demagochia d’istas zagueras horas por endimoniar a nuestra sala no perteneixe a intreses mosicals. […] Diversidat, tolerancia, respecto y pluriculturalitat son as nuestras directrices‘.

A plataforma Acción Popular Contra a Impunidat metió en alerta d’a programación d’o concierto d’a colla italiana, y EUPV y Compromís s’adhibioron decamín a la denuncia. Amás, collas como Artur Caravan y Hugo Mas ya han anunciau que suspendeban o concierto que heban de fer en a Black Note: ‘Con chent capable de programar actividatz nazis no queremos tractos. Con istas cosas no se  chuga’, han dito a traviés d’os retz socials, a on as criticas a la sala tamién s’han feito visteras. Por a suya parte, a discografica Malatesta Records ha publicau un comunicau en a web en que amostra ‘total repulsa a qualsiquier iniciativa en pro d’a extrema dreita, especialment dentro de l’ambito cultural y mosical’, y anuncia que, a tamás d’haber programau en a Black Note mientres istos zaguers meses, no le queda garra atra opción que cancelar a resta de programación zarrada dica o verano‘. En tot caso, diz que a decisión será revocada si a sala finalment cancela o concierto de Killer Sorpresa.

Acción Popular Contra a Impunidat, EUPV y Compromís ya han demandau a os propietarios d’o local que no den ‘cobertura a ista mena de bandas que fomentan l’odio y a intolerancia’ y sobre tot ‘que no deixan que iste diya o local se convierta en un puesto d’exaltación d’o nazismo y o faixismo’. A plataforma remera que Killer Sorpresa ha actuau en bells conciertos nazis en Italia y forma parte d’a scena mosical neonazi‘. Por ixo, declara: ‘No queremos que Valencia se convierta en un puesto habitual de pelegrinache nazi y faixista, an que se puedan organizar ista mena d’acontecimientos con total y absoluta impunidat.’

Tanto a plataforma como EUPV han emplazau a la fiscalía y a delegación d’o gubierno valenciano a que actúen ta sancionar qualsiquier exaltación d’o nazismo que se pueda producir’, y a las fuerzas de seguridat, ‘que prengan as midas oportunas ta evitar problemas d’orden publico’.

Amás, o diputau d’EUPV-Os Verdes en o congreso espanyol, Ricardo Sixto, s’ha amostrau alticamau por a celebración d’un concierto como iste, que podría ‘vulnerar os dreitos alazetals d’as personas y as suyas libertatz’. De vez, ha instau a os propietarios d’o local a que reflexionen sobre iste concierto y ha alertau d’o risque de que  i haiga ‘un enaltecimiento de valors nazis, xenofobos y antidemocraticos, que no habría de tener cullida en garra parte’.

Consuelo Castillo, rechidora d’a colla municipal Compromís en Valencia, ha dito que o concierto prochectaba una imachen penible d’a ciudat‘, y ha exichiu tolerancia zero a o Concello de Valencia. Tamién ha demandau que cusire que no i haiga exaltacions nazis y no deixe d’actuar con a sincusa de que l’acto se fa en un espacio privau.

Fuent: http://www.vilaweb.cat/noticia/4070909/20130104/sala-black-note-defensa-programacio-grup-neonazi.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.