A Sant Silvestre de Teruel se presenta con novedatz

O recorriu será más chicot y prencipiará una hora antis

Presentación d'a Sant Silvestre (Foto: Concello de Teruel)

Presentación d’a Sant Silvestre (Foto: Concello de Teruel)

O venient 31 d’aviento se ferá a XXII Sant Silvestre en Teruel, una fita que cada anyada arrocla más participants y que, en ista edición, presenta bellas novedatz ta que encara sigan más as personas que puedan participar-ie.

Asinas, o prencipio d’a preba s’enanta una hora ta que, en salindo a las 19 horas, siga más facil que puedan correr ixas personas que antis más no lo feban en rematar muito tardi y no poder plegar a tiempo t’a cena de Cabo d’anyo. Antimás no se convocan categorías, y nomás bi habrá premios t’os ganadors absolutos, masculin y femenin, que se levarán a tradicional cesta de Nadal, encara que bi habrá mini cestas t’os disbraces más orichinals (dica agora no se’n daba que una), antimás de dos pernils t’as dos familias que más miembros en participen en a preba, por cortesía de D.O. Pernil de Teruel.

D’atra man, y estando una preba más que más popular, a distancia s’achique pasando d’os 4.800 metros a 3.600, en considerar que yera masiau t’a más gran parti d’os participants. Serán dos vueltas a un circuito de bells 1.800 metros, o mesmo que en anyadas anteriors, pero sacando-ne a parti que iba por a Carrera Sant Fernando y Fernando Hué, una zona fosca y poco transitada y que antimás provocaba problemas de trafico.

Os participants, que seguntes informa o concello, s’han duplicau en as zaguers tres anyadas, podrán fer servir os vestuarios y duchas d’a piscina climatizada.

L’itinerario prencipia en o Servicio Municipal d’Esportes en a Carrera Sant Chuan Bosco y contina por Carrera Chuez Villanueva, Carrera Balbastro, Retinda Plaza la Constitución, Avda Sanz Gadea, Avda Ruiz Jarabo, Retonda chunto a los P.P. Paúles, Ronda de Toledo (arredol d’o parque), Carrera Ronda d’o Parque y Sant Chuan Bosco.

Itinerario

Recorriu d’a preba (Foto: Concello de Teruel)

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.