A sauceda de Fraga s’arrasó sin permiso d’o Servicio Provincial de Meyo Ambient

Ecolochistas en Acción denuncia en un comunicau a pasividat d'as administracións en o respectivo a iste afer.

Imachen d'a zona afectada. (Foto: Ecolochistas en Acción)

Imachen d’a zona afectada. (Foto: Ecolochistas en Acción)

A zona afectada d’a Cinca, declarada Puesto d’Intrés Comunitario (L.I.C.) y catalogada como parte d’o Ret Natura 2000 por a suya valor ecolochica, fuo severament dañada, tal como denunció Ecolochistas en Acción o pasau agüerro, por o dragau d’o río y a eliminación de, alto u baixo, un 75% d’a vechetación natural present en a zona. A Confederación Hidrografica de l’Ebro, a instancias d’o Concello de Fraga, estió a encargada de levar a cabo as obras dimpués d’una tramitación d’o prochecto completament irregular en a qual se fació servir una Declaración d’Impacto Ambiental axena, a d’un prochecto de canal d’auguas bravas, finalment no executau, ta chustificar una actuación de raso destructiva que afectó a l’hábitat d’especies protechidas, entre atras a loira, y a un important corredor biolochico que permite o transito d’especies protechidas dende as sierras pirinencas ent’a depresión de l’Ebro.

O tramo de río an que s’actuó, centrau entre totz dos puents de Fraga que unen os prencipals nuclios urbans d’a población, ye declarau dende fa anyos como Mont d’Utilidat Publica (M.U.P. H-0541), tal como se reconoixe en a mesma Declaración d’Impacto Ambiental que se fació, en a mesma zona, t’o prochecto de canal d’auguas bravas . O mesmo Instituto Aragonés de Chestión Ambiental (INAGA), quan autorizó as obras en o río, indicaba o caracter de Mont d’Utilidat Publica de l’aria afectada y, tal como requieren as normas ambientals, metió como requisito necesario a obtención d’o permiso que heba de conceder o Servicio Provincial d’Agricultura, Ganadería y Meyo Ambient de Uesca ta obrar en o Mont Publico. Manimenos iste Servicio Provincial, dimpués d’estar preguntau por Ecolochistas en Acción, indicó por escrito que no s’heba solicitau garra permiso d’actuación y que, por tanto, no heba concediu permiso belún, deixando mas en evidencia as irregularidatz levadas a cabo en un proceso administrativo de dubdosa legalidat.

L’Administración Publica tiene a obligación legal de sancionar as infraccions grieus, como as d’obrar sin permiso en un Mont Publico, que amás ye Puesto d’Intrés Comunitario y perteneixe a o Ret Natura 2000, y por ixo Ecolochistas en Acción, solicitó por dos veces que s’ubrise un expedient sancionador contra os responsables d’a Confederación Hidrografica. Manimenos, o citau Servicio Provincial s’ha negau a ixo alegando que a zona afectada no ye dentro d’o M.U.P. H-0541, contradicindo no solament a l’INAGA, u a o Ministerio de Meyo Ambient quan aprebó o prochecto de canal d’auguas bravas, sino tamién o que indican os propios Sistemas d’Información Cheografica d’o Gubierno d’Aragón, qualos mapas se pueden consultar en internet y que fan palmaria a pertenencia d’a zona afectada a la parte central d’o Mont d’Utilidat Publica H-0541, que de feito se diz Riberas d’o Cinca en Fraga.

Transcorrius nueu meses dende os feitos denunciaus, Ecolochistas en Acción sinyala que “resulta muit chocant o silencio que guardan sobre l’afer o Ministerio d’Agricultura, Alimentación y Meyo Ambient, órgano hierarquico superior d’a Confederación Hidrografica de l’Ebro, y o Departamento d’Agricultura, Ganadería y Meyo Ambient d’Aragón, organismos publicos a os qual s’informó d’as irregularidatz cometidas sin que aparentment haigan feito brenca a o respecto”. As nuevas anomalías administrativas detectadas en o Servicio Provincial d’Agricultura, Ganadería y Meyo Ambient respective a o Mont Publico “no fan que acrecentar as sospeitas que o estau de dreito ambiental en Espanya brila especialment por a suya ausencia”, sinyalan dende a organización.

Fuent: http://www.ecologistasenaccion.org/article28511.html

Una rispuesta a A sauceda de Fraga s’arrasó sin permiso d’o Servicio Provincial de Meyo Ambient

  1. Pingback: Un bosque de sauces en Fraga ha sido talado sin permiso del Servicio Provincial de medio ambiente [AN]

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.