A setena edición d’a Bicicletada de Zaragoza reivindicará os ‘camins escolars’

Pedalea y La Ciclería organizan a 7ª Bicicletada Escolar en Zaragoza. A la fin d'a marcha, en o Parque Bruil, se ferán actividatz t'os ninos y ninas

bicicletada-zgz-2011-foto-pedalea

Bicicletada Escolar de 2011. Foto: Pedalea

Iste domingo, 26 de mayo, se celebrará a 7ª Edición d’a Bicicletada Escolar de Zaragoza. En ista ocasión a tematica d’a marcha ye a promoción d’os camins escolars en os colechios publicos de Zaragoza. “Se tracta de prochectos que, por medio d’a educación vial, a participación ciudadana y chicotas intervencions en a vía publica, aconsiguen que os desplazamientos d’os escolars sían mas seguros y autonomos, ya sían a piet u en bicicleta. Intervencions d’ista mena fan enfasis en evitar as situacions de periglo que puedan derivar en accident”, apuntan dende Pedalea, colectivo organizador de conchunta con La Ciclería.

En una dirección radicalment opuesta ye o borrador d’o nuevo codigo de circulación, que tracta solament de paliar as conseqüencias d’os atropellos. Dito borrador, d’aprebar-se, “obligará a os ciclistas a circular en ciudat apegaus a la dreita d’a vía, aumentando asinas enormement as situacions de periglo (puertas d’autos aparcaus que s’ubren, vehíclos que tractan d’abanzar sin respectar a distancia minima de seguridat, etc.). De vez imposará l’uso obligatorio d’o casco ta tractar de minimizar as conseqüencias d’uns accidents que serán fruito, en un porcentache elevau, d’ixe mesmo cambeo en a normativa”, adhibe Pedalea.

Pedalea creye que “o millor casco ye o que nunca no ha habiu d’estar emplegau y que o millor camín ta evitar fatalidatz ye fer d’as ciudatz un puesto mas seguro ta piatons y ciclistas sía quala sía a suya edat”. Por ixo quieren potenciar os camins escolars y “fer vistero, por medio d’una bicicletada, a o grupo mas ignorau y vulnerable d’a vía publica: ninos y ninas en edat escolar”.

A 7ª Bicicletada Escolar ‘Une-te a os camins escolars’ prencipiará a las 11.00 horas, d’iste domingo 26 de mayo, dende a parte de dezaga d’a Loncha (Paseu Echegaray y Caballero) de Zaragoza.

Fuent: http://arainfo.org/2013/05/la-septima-edicion-de-la-bicicletada-de-zaragoza-reivindicara-los-caminos-escolares/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.