A siniestralidat laboral conducindo se reduce en Aragón un 23% en o que va d’anyo

Os accidents de trafico ‘in itínere’ continan triplicando a os que se producen dentro d'a chornada laboral

 

Foto: Gubierno d'Aragón

Foto: Gubierno d’Aragón

A tendencia en Aragón por o que fa a accidents laborals conducindo ye clarament descendent en os zaguers anyos, tanto en numero como en gravedat. Dende 2008, os accidents de trafico en chornada de treballo s’han reduciu mas d’un 73% y os que se producen “in itínere” tamién han descendiu un 53%.

A siniestralidat laboral conducindo en Aragón s’ha reduciu, en o que va d’anyo, un 23% respective a o mesmo periodo de 2013. Entre chinero y setiembre d’o pasau anyo se producioron 1.138 accidents de trafico, tanto en chornada laboral como in itínere (en ir u tornar d’o treballo). Manimenos, en istes nueu meses de 2014, s’han produciu 878 accidents d’os que, seis han resultau mortals, un menos que en 2013.

Istes datos s’han conoixiu iste maitín en a Chornada “Seguridat vial pa Interpresas” a la quala han asistiu o consellero d’Economía y Emplego d’o Gubierno d’Aragón, Francisco Bono, y o director cheneral de Treballo, Jesús Divassón. A trobada, organizada por a Dirección Cheneral de Trafico, ha contau con os directors chenerals, cherents y responsables d’interpresas amás d’a directora cheneral d’Aenor Aragón, Marisa Claver, y o Chefe Provincial de Trafico de Zaragoza, Eduardo Checa.

A present Chornada s’emmarca dentro d’as linias d’actuación d’a Estratechia Aragonesa de Seguridat y Salut 2010-2014 en materia de prevención de risgos laborals, incluius os vials.

En iste sentiu, ha sinyalau o consellero Bono, “ista chornada nos permite de reconoixer a aquellas interpresas que achugan por a prevención y tamién nos permite d’aprender d’as suyas ideyas y as suyas experiencias, con independencia d’a magnitut de cadaguna, y parar cuenta que se pueden fer a-saber-las cosas con coste economico y sin ell”.

Porque todas istas midas, en definitiva, aduyan a las interpresas a amillorar a seguridat y a salut d’os suyos treballadors de traza que, privando a siniestralidat, tamién aumentan a suya competitividat” ha recalcau Bono.

Dende a Dirección Cheneral de Trafico han recordau que os desplazamientos por motivos de treballo producen gran parte d’a mobilidat que se chenera diariament. Debant de tantos movimientos o risgo que se produzca un accident de trafico s’incrementa, por o que ye important actuar en prevención.

A o respective, Francisco Bono tamién ha sinyalau que “os accidents de trafico initínere’ continan triplicando a las que se producen dentro d’a chornada laboral, por o que cal conscienciar a todas as partes i embrecadas que a prevención prencipia dende que salimos de casa nuestra de maitins”.

Bono ha finalizau dicindo que “a prevención d’accidents de trafico vinculaus a l’entorno laboral debe abordar-se de traza coordinada, tanto con politicas preventivas laborals como de seguridat vial. Por ixo, resulta estratechica a implantación d’una cultura de seguridat vial en as interpresas integrada dentro en a suya chestión preventiva de risgos laborals y de chestión d’a calidat”.

Fuent: http://www.cronicadearagon.es/wordpress/aragon/la-siniestralidad-laboral-al-volante-se-reduce-en-aragon-un-23-en-lo-que-va-de-ano

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.