A tasa anyal de inflación en chunio se situa en o -1,0% en Aragón y o -0,8% en o conchunto de l’estau

Os pres d'a enerchía son os prencipals responsables d'o signo negativo d'a inflación

Os pres de consumo creixioron en Aragón quatro decenas en chunio respective a o mes anterior, de forma similar a lo succediu en o promedio de l’estau, an que a puyada estió de cinco decenas mensuals, seguntes indican os datos publicaus hue por l’Instituto Nacional d’Estatistica (INE). Manimenos iste incremento mensual d’os pres, a tasa anual de inflación remaniba en terreno negativo en chunio en rechistrar un -1,0% en Aragón, manimenos una decena menos negativa que a rechistrada en mayo. De forma similar, en o conchunto de l’estau a taxa de inflación se situó en o -0,8% anual en chunio, dos decenas por alto d’o -1,0% observau en mayo.

Iste comportamiento d’a inflación viene explicau una vez mas en a suya mayor parte por o pre internacional d’o petrolio, que a traviés d’os pres de combustibles y carburantes exerce una notable influencia sobre os pres de consumo en todas as economías.

Por a suya parte, en a Eurozona a taxa de inflación en chunio estió d’o 0,1% anual, dos decenas por alto d’o dato de mayo. Con ixo, o diferencial favorable yera de 1,1 puntos percentuals en o caso d’Aragón y de nueu decenas en o conchunto d’o estau.

Por comparanza con o mes anterior, os pres en chunio aumentoron en Aragón en seis grupos de consumo, se mantenioron estables en atros quatro y descendioron en totz dos restantes. Asinas, a mayor puyada se produció en vivienda, con un alza d’o 2,4% mensual, motivada fundamentalment por l’aumento de pres d’a electricidat. A distancia, puyoron nueu decenas mensuals os pres de ocio y cultura, con a cercanía d’a temporada estival, mientres en transporte o incremento yera de ueito decenas mensuals, a causa d’a puyada de pres d’os combustibles. De forma mas moderada, puyoron dos decenas mensuals os pres d’atros bienes y servicios. Por zaguer, puyoron una decena mensual en chunio os pres de menaje y de alimentos y bebidas no alcoolicas en Aragón.

No sufrioron variación mensual denguna os pres de medicina, comunicacions, amostranza y hotels, cafés y restaurants. En totz dos grupos de consumo restants os pres experimentoron baixadas mensuals en Aragón. En o caso de bebidas alcoholicas y tabaco a baixada estió d’una decena mensual, mientres que l’encieto abanzau de las rebaixas de estio se reflectó en una baixada d’o 1,6% mensual en os pres de vestiu y calzau.

Cuento a o mes de chunio de l’anyo anterior, as taxas anuals de inflación en chunio yeran positivas en nueu d’os dotze grupos de consumo en Aragón, encara que con caracter cheneral se tracta de taxas muit moderadas.

O grupo más inflacionista en Aragón en chunio yera o de comunicacions, con una taxa de l’1,8% anual, seguiu d’alimentos y bebidas no alcoolicas, el pres d’os quals aumentaban un 1,4% en un anyo.

Dimpués d’ells, amostranza y atros biens y servicios presentaban en chunio una taxa de inflación de l’1,0% anual en Aragón. Contino, y con taxas anuals inferiors a un punto percentual, se trobaban en chunio os grupos de consumo de medicina (0,9% anual), hostelería (0,7% anual), vestiu y calzau (0,6% anual), menaje (0,4% anual) y bebidas alcoolicas y tabaco (0,2% anual).

En os tres grupos de consumo restantes as taxas de inflación yeran negativas en chunio en Aragón. Se tracta de ocio y cultura (-2,3% anual), transporte (-3,2% anual) y vivienda (-6,9% anual), estando o pre d’a enerchía o prencipal factor subchacent, particularment en totz dos zaguers casos.

A inflación subchacent, que ye aquella que excluye d’o suyo calculo os elementos mas volatils (alimentos sin elaboración y productos enercheticos), desaceleraba lieument en chunio dica situar-se en o 0,5% anual en Aragón, una decena por baixo d’o mes zaguero. En un tono similar, en o conchunto d’Espanya a inflación subchacent disminuía una decena dica o 0,6% anual. Por a suya parte, en o promedio d’a UEM a taxa de inflación subchacent se manteneba estable en chunio en o 0,8% anual.

O petroleo Brent cotizó en chunio a una meya de 47,8 dolars por barril, un 2,1% mas caro que en mayo, pero encara un 21,0% mas barato que en o mes de chunio de 2015. En o caso que o petróleo estabilice o suya cotización arredol d’os 50 dolars por barril en a segunda metat de l’anyo, o “efecto escalón” en a comparanza anual d’os suyos pres continará diluyéndo-se ta desapareixer a partir d’agosto, momento en que as taxas de inflación tornarían a terreno positivo empentadas por o componente enerchetico.

En suma, cal insistir que un mes mas sigue estando fundamentalment o pre d’a enerchía o que contina empentando a la baixa a inflación cheneral.

Por provincias aragonesas, a taxa de inflación en chunio de 2016 estió d’o -1,1% anual en Uesca, d’o -1,0% anual en Teruel y d’o -0,9% anual en Zaragoza.

En a zaguera reunión de politica monetaria d’o Banco Central Europeo, celebrada o pasau día 2 de chunio en Viena, se decidió mantener sin cambeos os tipos d’intrés de referencia asinas como as medidas no convencionals de estimulo monetario, anunciando que a partir d’o 8 de chunio o BCE prencipiaría a mercar bonos d’interpresas y o día 22 realizará a primera subasta de liquididat a quatro anyos. Se suchirió, amás, que os tipos de referencia remanirían en zero u proximos a ixe ran entre os proximos tres anyos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.