A temporalidat y a estacionalidat, protagonistas d’a baixada de l’ature en chunio

A fuerte baixada d'as cifras de personas esqueferadas amagan una gran temporalidat en os contractos con ocasión d'a temporada de verano

Oficina de l'INAEM (Foto: D.Ch.A.)

Oficina de l’INAEM (Foto: D.Ch.A.)

Cierto optimismo pareixe existir, mas que mas en os diferents gubiernos (aragonés y espanyol) dimpués d’unatra baixada d’a cifra de personas esqueferadas tanto en Aragón como en a resta de l’Estau. Manimenos, pese a las 4.734 personas menos en as listas de l’INAEM (un 4,13% menos que en mayo), pareixe que si no por o treballo estacional d’o verano (campanyas agricolas, turismo y rebaixas en os comercios) istas cifras podrían no haber estau tant optimistas, pues a gran mayoría de contractos laborals han estau en beluna d’istas ocupacions.

Asinas mesmo, o 93% d’os contractos ha estau temporal (38.827), con nomás 2.436 contractos indefinius, pa fer frent a la campanya de verano en os diferents sectors productivos. Dende a industria, nomás un 6,1% d’os contractos s’ha realizau en iste sector (2.379 contractos, 317 fixos) con un descenso d’unas 600 personas en as listas de l’ature. En a construcción as cifras son si fa u no fa parellanas.

Con tot y con ixo, as cifras chenerals d’ature son mayors que no’n yeran en chunio de 2012, un 4,93% mas de personas esqueferadas respective a l’anyo pasau. Agora que dende as institucions s’amostran optimistas. O consellero d’Economía y Emplego d’o Gubierno d’Aragón, Francisco Bono, considera que “por as cifras absolutas y por estar tres meses consecutivos de baixada podríanos asperar que isto estase o prencipio d’a tendencia“, considerando “muit buenos” os datos d’iste mes.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.