A Torre de l’augua celebra o V cabo d’anyo d’a Expo con una corrida popular

Decenas de personas puyará dica lo piso 23 en una preba esportiva o sabado de maitins

Torre de l'augua (Foto: D.Ch.A.)

Torre de l’augua (Foto: D.Ch.A.)

En a Torre de l’augua se ferá iste sabado 14 de setiembre un doble evento esportivo de caracter popular, organizau por a sociedat publica Expo Zaragoza Interpresarial, en colaboración con o Centro Hidrotermal Las Ranillas. Adintro d’as actividatz que celebran o V cabo d’anyo d’a rematanza d’a Expo, iste edificio será o scenario ta un “Desafío Running” y una “Andada popular” ta totz os publicos.

A primer preba será una corrida en formato de contrarreloch, que penderá en puyar os 23 pisos de l’edificio por as costeras que bi ha arredol d’a suya estructura interior. En total, 1.500 metros de recorriu con un deslibel d’o 6% si fa u no fa. Se revivirá asinas a corrida popular de puyada t’a Torre de l’Augua que ya se celebró en l’estiu de 2008, con un gran exito de participación.

A corrida, que prencipiará a las 9 d’o maitin, contará con quatre categorías: absoluta masculina y femenina (dica 39 anyadas) y veterana masculina y femenina, ta mayor de 40 anyadas. Ye previsto que i participen una representación d’os bombers de Zaragoza, que puyarán por a Torre con o suyo equipo de cutio.

A segunda actividat será una andada popular por aintro d’o Parque de l’Augua Luis Buñuel, endrezada t’o publico cheneral, individual u colectivo, que quiera fer una actividat fisica en a naturaleza. O recorriu, de quasi 5 k, prencipiará en a plaza d’a Torre de l’Augua y irá arredol d’o Campo de Golf ta plegar en a Torre atra vegada. Ta rematar, os participants puyarán por l’edificio dica o 23eno piso.

Ta participar-ie cal dentrar en a web www.lasranillas.com/hidrotermal dica o chueves. O maximo de participants será de 200 personas en l’Andada Popular y de 100 en o Desafío Running.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.