A UCI deixa sin Tours a Lance Armstrong

A UCI accepta a sanción por dopache d'a USADA y retira totz os triunfos d'o ciclista estadounidense dende agosto de 1998, en especial os siet Tours de Francia

Armstrong puyando l’Alpe d’Huez. Foto: Wikipedia

Dende agora, Lance Armstrong tendrá os mesmos Tours de Francia ganaus que a gran mayoría de ciclistas: zero. Y ye que a Unión Ciclista Internacional (UCI), o maximo organismo d’o ciclismo le ha desposeyiu d’os siet Tours que heba ganau entre 1999 y 2005 debiu a la demanda d’a USADA (Achencia Antidopache d’Estaus Unius) a l’organismo internacional ta que sacase a Armstrong os suyos triunfos dende agosto de 1998 por dopache. Amás se le sanciona de por vida, encara que Armstrong ya ye retirau. A UCI no recurrirá a o Tribunal d’Arbitrache Esportivo (TAS). Armstrong heba decidiu de no esfender-se d’as acusacions feitas por a USADA.

Se reconoixe que Armstrong se dopó de contino y mesmo que facilitó a os suyos companyers d’equipo poder fer-lo. De feito os suyos excompanyers que lo delatoron (Hincapié, Barry, Leipheimer, Vande Velde, Zabriskie y Danielson) podrían estar sancionaus a seis meses de suspensión en una reunión en a que tamién se decidirá si os Tours que pierde Armstrong tienen ganador u quedan disiertos, como demanda a dirección d’o Tour. En caso de que os segundos pasen a estar ganadors (como pasó con Óscar Pereiro y Andy Schleck), l’aragonés Fernando Escartín figuraría como subcampión d’o Tour de 1999, dezaga d’o suizo Alex Zülle.

Seguntes dició Pat McQuaid, president d’a UCI “Lance Armstrong no tien puesto en o ciclismo, mereixe estar xublidau por o ciclismo”. “Iste ye o nuestro primer trango en o viache d’o nuevo ciclismo”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.