A UE estudea multar Espanya por mentir en o deficit y rezagar as midas d’achuste

O gubierno espanyol ha refusau as acusacions que han saliu d'achencia Reuters

Oli Rehn y o ministro espanyol Luis de Guindos

Oli Rehn y o ministro espanyol Luis de Guindos

L’achencia de noticias Reuters ha pasau hue una información seguntes a qual o gubierno espanyol heba puyau artificialment os datos de deficit dica o 8%, dos puntos por dencima, t’aconseguir amillorar as opcions de cumplir os obchectivos marcaus por Europa. O gubierno de Mariano Rajoy habria feito iste apanyo t’acusar a José Luis Rodríguez Zapatero de mentir y chustificar a puyada, por eixemplo, d’o IRPF.

Si son ciertas istas informacions, a Unión Europea podria multar a l’Estau espanyol, que hese feito isto ta tener millors datos iste anyo. Amás, a multa podria estar tamién por rezagar as midas d’achuste dica dimpués d’as esleccions andaluzas, en abril. A rezaga d’istas midas fa pensar a Europa que o creiximiento espanyol seria pior a plazo luengo.

Seguntes un comisario europeo citau por Reuters, as multas contra Espanya son inexcusables si ye cierto isto, pero o vicepresident d’a Comisión Europeya, Oli Rehn, ha dito que as informacions no son ciertas de raso, porque encara se ye estudeando o caso d’a economía espanyola. Tamién ha negau a información o ministerio d’Economía espanyol, que ha anunciau que ferá publico un comunicau ta desmentir-las.

En os primers diyas d’o gubierno de Mariano Rajoy l’executivo fació publico que o deficit publico s’heba esvarrau en más de dos puntos, pero os esferents ministros facioron publicas cifras que no coincidiban.

Fuent: http://praza.com/economia/146/a-ue-estuda-sancionar-a-espana-por-adiar-as-reformas-ata-que-pasen-os-comicios-andaluces/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.