A UE fará un informe sobre a contaminación d’o Galligo por lindano y exichirá explicacions a os Gubiernos espanyol y aragonés

Adolfo Barrena, compareixió en a Comisión de Peticions d'o Parlamento Europeu y exichió que a contaminación por lindano se considere un problema transfronterizo

Protesta a las puertas d'a DCha. Foto: Coordinadera Biscarrués

Protesta a las puertas d’a DCha. Foto: Coordinadera Biscarrués

O Coordinador Cheneral d’IU Aragón, Adolfo Barrena, ha exichiu responsabilidatz a os Gubierno d’Espanya y Aragón y ha reclamau un compromís por parte d’a Unión Europea ta que a contaminación d’o río Galligo por lindano se solucione de forma immediata.

Una reivindicación que Barrena tresladó iste luns a la Comisión de Peticions d’a Unión Europea. A presidenta d’a Comisión, Cecilia Wikström, ha emparau a solicitut d’IU de solicitar un informe sobre o lindano y as suyas afeccions en Aragón a la Comisión Europea asinas como exichir explicacions a las autoridatz espanyolas, tanto a Madrit como a o Gubierno aragonés por a suya chestión sobre o mesmo.

Barrena ha lamentau que, por agora, a presidenta d’a Comisión no haiga dau un paso mas y haiga reclamau fondos europeus destinaus a la descontaminación d’a compleganza d’o Galligo, porque “ista situación no puede dilatar-se en o tiempo y as actuacions ta acabar con o problema han de desenrollar-se dende hue mesmo” y “una forma de prencipiar sería que a UE considerase a contaminación por iste pesticida como un problema d’a unión, ya que no solament afecta a la compleganza d’o Galligo”. “Amás d’Aragón, a contaminación por lindano afecta a una parte significativa d’o territorio d’a UE, como en Alemanya y Francia”, ha adhibiu.

“En Aragón, totz istes repuis son almagazenaus en precario, en puestos inadequaus, sin sellau que guarencie que no i hai vertius ni lixiviaus en o río y que ye unatra d’as causas, talment a prencipal, d’a contaminación de toda a compleganza”, ha explicau o Coordinador ta recordar que as Administracions publicas nunca no han abordau un Plan Integral de Descontaminación como exichiba un estudeo encargau en 1990.

Barrena ha solicitau a Wikström que a UE tracte iste grieu problema descrito como transfronterizo y que requiere midas a libel europeu. Como primer mida, IU ha demandau a la presidenta d’a Comisión que a Unión aporte fondos d’os suyos programas ta cofinanciar l’urchent y necesario Plan Integral de Descontaminación d’o río Galligo. En segundo puesto, ha manifestau a necesidat que a UE sancione a o Estau espanyol por o grieu incumplimiento d’as obligacions establidas en os convenios internacionals sinyaus y por a vulneración de quantas directivas comunitarias referidas a la calidat d’as auguas, a os controls sanitarios y a las afeccions a o medio ambient y a salut publicas.

Amás, Barrena ha meso encima d’a mesa a necesidat de creyar un ret de suministro alternativo ta que os mas de vint municipios que prenen augua d’o Galligo puedan acceder a una augua libre de lindano y de calidat, “ya que levan mas de 30 anyos estando os paganos d’un granizo desastre ecolochico que ha provocau, amás, un grieu problema de salut publica”.

Por lo que fa a Inquinosa, IU ha reiterau a necesidat que a UE acace a suya actividat economica y industrial “porque qui contamina debe pagar”, ha concluiu Barrena en referencia a o prencipio replegau en una directiva europea que estableixe un marco común de responsabilidat ambiental con a finalidat de prevenir y reparar os danyos causaus a os animals, as plantas, os habitatz naturals y os recursos hidricos.

Iste martes, o Coordinador d’IU Aragón mantendrá una reunión con o Director Cheneral de Medio Ambient d’a UE y s’ha convocau una rueda de prensa a las 11.30 en a sala de prensa de l’Europarlamento.

Fuent: http://arainfo.org/2016/03/la-ue-hara-un-informe-sobre-la-contaminacion-del-galligo-por-lindano-y-exigira-explicaciones-a-los-gobiernos-espanol-y-aragones/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.