A vaga estudiantil en Aragón contra a LOMCE vuedó as aulas y salió t’as carreras

Os sindicatos convocants han considerau un exito a convocatoria y cifran o seguimiento en un 90%. A Universidat de Zaragoza y o Gubierno aragonés han dau datos desiguals

Foto: Pablo Ibáñez (Arainfo). (CC-BY-SA)

Foto: Pablo Ibáñez (Arainfo). (CC-BY-SA)

Ahiere chueves 20 de noviembre as y os estudiants aragoneses d’ensinyanzas medias y universidat yeran convocaus a fer vaga en contra d’os retalles, a implantación d’a nueva lei d’educación (LOMCE), a puyada d’as taxas y a falta de becas. Os sindicatos y asambleyas estudiantils convocants (Asambleyas de Sciencias, Educación y Filosofía y Letras; CEPA, Estudiants Por o Publico, Seira, CJC, EDU, ADEA y FES) han considerau un exito a vaga, con un porcentache d’un 89% en universidat y un 93% en ensinyanzas medias.

En o campus universitario d’a Pza. S. Francisco de Zaragoza l’ature ha estau quasi total. Dende fuents universitarias corroboraban este dato, encara que cifraban en o CPS una chicota participación en a vaga. En o campus de Uesca a universidat ha cifrau o seguimiento en un 60%, asinas como un 55% de seguimiento en Teruel. En L’Almunia de Donya Godina s’ha cifrau o seguimiento en un 5%.

Dende o Gubierno d’Aragón han destacau un seguimiento desigual en ensinyanzas medias (ESO, Bachillerato y FP), con mayor fuerza en as capitals provincials, pero con menos fuerza en a resta de localidatz.

Desenrrollo d’os piquetz y d’as manifestacions

Policía dentro d'o campus de Pza. S. Francisco. Foto: @huelgaestudiara

Policía dentro d’o campus de Pza. S. Francisco. Foto: @huelgaestudiara

En a chornada de vaga no se destacoron incidents d’importancia, fueras d’a entrada d’a policía sin permiso rectoral en o campus d’a Pza. S. Francisco de Zaragoza a las 6:30 d’o maitín, do han identificau a las 45 personas que yeran en a entrada d’o campus parando os piquetz. A policía asinas mesmo ha meso una pinyora y ha requisau material. Esta acción ha estau criticada por os sindicatos convocants, asinas como atras asociacions y partius politicos que han tornau a demandar a dimisión d’o Delegau de Gubierno espanyol, Gustavo Alcalde. Seguntes fuents policials citadas por l’achencia EFE, esta actuación s’habría produciu conseqüencia de bell contenedor vulcau en os arredols d’a Facultat de Medicina. Tamién i ha habiu bella identificación policial en Uesca.

En Zaragoza, a las 11 d’o maitín rancaba una manifestación dende a Pza. San Francisco dica a Delegación d’o Gubierno espanyol en a Pza. d’o Pilar. Mils de personas ha plenau as carreras d’a capital aragonesa. As manifestants han reclamau a dimisión d’a consellera d’Educación Dolores Serrat, asinas como han amostrau a suya solidaridat con os 43 estudiants mexicanos desapareixius en Ayotzinapa, de qui s’acusa a o Gubierno mexicano d’a suya desaparición. Íñigo Guitarte, portavoz d’o comité de vaga, ha declarau que “unos 1.200 estudiants han estau forachitaus d’a universidat y qualques centros no cumplen as condicions de seguridat y ixo sumau a la falta de profesorau y a puyada de taxas“. Posteriorment, de tardes, se realizó atra manifestación con menor asistencia dende o Paraninfo d’a Universidat de Zaragoza t’a siede d’o Gubierno d’Aragón.

Piquet en o instituto Pirineos de Chaca. Foto: Purna Aragón (@PURNA-ARAGON)

Piquet en o instituto Pirineos de Chaca. Foto: Purna Aragón (@PURNA-ARAGON)

En Uesca, dimpués d’os piquetz, que encomenzoron a las 8 d’o maitín en a Escuela d’Arte, unas 200 personas s’ha chuntau en a Pza. Nabarra pa salir en manifestación a las 12 h. En o manifiesto, seguntes publica Arainfo, s’ha feito enfasi en a reivindicación d’a expulsión d’as interpresas d’o sistema educativo, a entrada y permanencia de qui no pueda pagar os estudios y a retirada d’a LOMCE y d’a FP dual. Tamién s’ha defendiu a escuela rural: “en os zaguers anyos hemos perdiu un total de 21 d’estas escuelas en o norte d’Aragón, suposando ello un factor decisivo en a desaparición d’estas poblacions“.

De maitins s’ha realizau manifestacions en atros puntos d’Aragón como Chaca, Samianigo u Taust. De tardes, amás de Zaragoza, Teruel ha realizau a suya manifestación.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.