A VI trobada d’estudios arredol de l’aragonés prencipia en Uesca

Aplega a estudiosos sobre a luenga dende 1997, y ye impulsada por o Consello d'a Fabla aragonesa

Dende iste chueves y dica o sabado, 8 d’octobre, se cilebra en l’Instituto de Estudios Altoaragoneses a seisena edición d’as chornadas sobre l’aragonés y a suya literatura “Trobada d’estudios y rechiras arredol d’a luenga aragonesa y a suya literatura”.

En a trobada, empentada por o Consello, s’estudiara elementz lingüisticos, rasgos aragoneses de bells textos en atras luengas, o as posibilidatz d’as nuevas tecnolochías con o naiximient d’o primer traductor online dende y enta l’aragonés u o corrector de textos tamién en aragonés, antimás de afers de toponimia de redoladas como Monegros.

Amás, i habrá atras actividatz programadas como presentacions de libros, y a mosica de Biella Nuei que ferá un recital de mosica en aragonés. A primer edición d’ista Trobada  se levó a cabo en 1997, dende alavez, s’han succediu atras 5 trobadas en que entidatz u universidatz intresadas en l’aragonés s’amanan ta Uesca ta tractar sobre a luenga y a literatura.

11 Rispuestas a A VI trobada d’estudios arredol de l’aragonés prencipia en Uesca

  1. Una trobada an que, per cierto, se prohíbe fer as comunicacions en a grafía de l’Academia de l’aragonés (u en a grafía que fa servir a SLA).

  2. Estas son las chornadas d’el Consello, e se no comulgas con ers, no cal que i presientes cosa. Per cierto, yo ya fa anyos que no i voi, pero estoi que per cada anayata van a menos, ¿no?

  3. Iste anyo poqueta chent y pocas presentacions (sí que van a menos). Es resumens y comunicacions no deixaban fer-los en altras ortografías, encara que han presentau a lo menos tres comunicacions en aragonés con la ortografía de l’ACAR (a lo menos las presentacions en powerpoint no teneban censura ortografica previa).

  4. a mirar si os fablesos dixamos de pleitiar por a ortografía… dica que un futuro gubierno aragonés empente o tema de l’academia y faiga una opción normativa, que cadaguno faiga servir a grafía que le pete. Sí, será surreyalista, una fabla tant chicota con tres u quatro sistemas graficos, pero án, si no en Aragón, iba a fer-se un homenache asinas a o surreyalismo. Cadaguno pensamos, y en tenemos de razons, que a grafía que femos servir ye a millor. O que no podemos ye dixar de charrar entre nusatros u creyar nuevos enemigos entre os que escriben diferent. Encara que bell-unos lo faigan, si no somos totz, iremos bien.

  5. A las presonas que aimamos l’aragonés y que beyemos dende difuera os pleitos ortograficos, mos mete asabelo tristos o rediculo que se está fendo a los güellos de a soziedá aragonesa.

  6. Vale, toyagar, pues que empecipien deixando presentar comunicacions con altras grafías y no pas dexichindo que, per eixemplo, ta conseguir o Diploma de especialización en Filología aragonesa, s’haiga de “morir al palo” de escribir con a grafía de 1987.

    Os que aimamos a luenga aragonesa lo femos independientment d’a grafía en a que s’exprese, pero tamién muitos de nusaltros pensamos que l’aragonés ha d’estar dignificau en a Romania y no pas tractau como si fuese una luenga agrafa y extranya a o suyo entorno.

  7. Antonio Serón Gascón

    Yo lebo bellas añadas alleno a isto d’a problematica de as grafias. Y solo quiero dizir-bos una cosa L’ARAGONES SE YE MORINDO, ¿cuanta chen trobas por o Pirineo qu’en fable? Cada begada menos. Lo diya que lo apedequemos, encara continarez barallando si bal ye con “V” o con “B”.
    A yo me bufa la pocha como cal escribir, lo que cal ye fablar-lo, sentir-lo por as carreras. Cada diya que pasaz escurruchando-bos a sesera de si escribo “moze” “mozet”, “mozetz”, “moce” u beste’n a mira lo que. Un fablan natibo muere y un mesache choben tresbate bocabulario.
    O problema no ye V u B, Z u C. O problema somos nusatros, toz queremos aber razon. Somos 4 y nos trestallamos en collas de 2 y, entre ixos 2, tampoco no se charran.
    Isto ye Aragon y os aragoneses

  8. Tiens razón Antonio. Pero es fablants nativos mueren y es mesaches chovens pierden vocabulario tanto si discutimos como si no sobre cómo escribir millor u sobre b’s y v’s. Lo important ye charrar-lo, creyar recursos en aragonés, aportar referents ta que os mesaches no pierdan o vocabulario y a luenga, investigar, escribir con b u con v, pero fer y creyar, como fan en arredol.com, y no pas destruir y criticar a es que fan. Asinas que ta debant totz es que charratz, fetz y creyatz en aragonés!

  9. A Seisena Trobada estió muito bien, calidá e muita chen, á lo menos lo que yo presenzié o sabado. Soi con bels comentarios de os que se fan astí en o cobalto. ¡Cuantismas enerxías somos malmetiendo indo cadagún á lo suyo buen implaz -e se tiene dreito, bagale que sí-, pero somos cuatro -agora unos poquetes más- e imos en guerrilla…Cal que prexinemos toz ¡TOZ! Yo goso dezir: Si tenemos un reloche, sabemos qué ora ye, si en tenemos dos, no. ¡Y en temnemos tres u cuatro! Parixemos mamelucos. Asinas ni unos ni atros imos á recaus. Yo sigo normas -en tanto no bin´aiga d´un consenso total e alazetal- que han feito chens que s´han abentau d´ellas e agora me cretican…Me pena muito ista situazión.

  10. As trobadas puyan cada begata de calidá. Bi abió ponenzias asabelo intresans, tamién comunicazions como as d’o tradutor debandita. Sobre a grafía ye tan fázil como leyer-se a combocatoria. En tot caso, entre que no aiga una autoridá ofizial lo más sensato ye continar con a más biella (y espardida), y dixar as demás como propestas enta lo futuro. Lo demás ye malmeter tiempo, chens e comprometer os recursos.

  11. Os alemans escribión cada periodico con as suyas propias lais ortograficas y no bi’n hubo ortografía ofizial dica relativament un “inte”. Y no guaire cosa pasaba, a chen charraba-lo y escribiba-lo sin garra espanto.

    O prencipal ye charrarlo y escribirlo como a tí te fa goyo. Pero emplegarlo. Encara no charro muito bien pero como deziba Francho Nagore “Cal que charrarlo aunque siga mal”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.