A violencia se dispara en Ucraína por as protestas pro-UE

26 personas morioron ahiere en os disturbios en Kiev, entre manifestants pro-UE y a policía

Foto d'archivo de disturbios en Kiev. Foto: Mstyslav Chernov (CC-BY-SA)

Foto d’archivo de disturbios en Kiev. Foto: Mstyslav Chernov (CC-BY-SA)

En o diya d’ahiere, 26 personas morioron entre policías antidisturbios y manifestants antigubernamentals en os enfrontinamientos en a capital ucrainana, Kiev, do se plegoron a fer servir armas de fuego. Os enfrontinamientos d’iste martes fuoron os mas duros dende o prencipio d’a crisi, dimpués d’a negativa d’o president ucrainano, Viktor Yanukovich, de continar as conversacions pa entrar en a Unión Europea.

Os manifestants proeuropeístas, mesmo refirmaus por a ultradreita, se concaroron con a policía, con coctels molotov, barracalas, cohetes u piedras y bandiando bell edificio. A policía movilizó mesmo vehíclos blindaus pa prebar de desaloixar dita plaza, o qual heba estau ordenau por o propio president Yanukovich. Mientres a batalla, resultoron feridas personas a embute, entre manifestants y policías, y 26 personas morioron. Entre as personas muertas, o periodista d’o periodico local Vesti, Viacheslav Veremei, que podría haber estau muerto a tiros por militants ucrainanos d’ultradreita.

O Ministerio d’Interior ucrainano denuncia que bi ha 349 policías ferius, mientres que o Ministerio de Sanidat cifra en 114 as manifestants que permaneixen feridas en os hespitals, encara que seguntes atras fuents como l’achencia EFE, as personas feridas en os disturbios podrían contar-se por qualques centenars.

Tamién bi ha habiu violencia en atras partes d’o país, como en Lvov, Ivano-Frankisvk u Ternopil, do s’ha arribau a incendiar edificios gubernamentals. A policía evitó a os opositors fer-se con armas de fuego en un quartel en Lvov.

As negociacions entre o gubierno y a oposición siguen sin arribar a un alcuerdo. O president Yanukovich demandó a os liders opositors que se distancien d’as collas radicals u “les fablará de traza diferent”. Se desconoixe si as conversacions continarán en venients horas u s’han albandonau definitivament.

Antiparti, a Unión Europea ha advertiu de posibles sancions a Ucraína por istos feitos “de traza urchent”. Durao Barroso, president d’a Comisión Europea, ha declarau que “no bi ha circumstancias que puedan lechitimar u chustificar” os feitos producius ista pasada nueit, pus, seguntes Barroso, o gubierno de Yanukovich “tien a responsabilidat de guaranciar a protección necesaria d’os dreitos fundamentals y as libertatz“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.