A volandrina esleixida au de l’anyada por SEO – Birdlife

T'a entidat conservacionista "un campo sin volandrinas ye un puesto menos sano t'as personas"

Volandrina (Foto: Wikipedia)

Volandrina (Foto: Wikipedia)

A volandrina (Hirundo rustica) ye o muixón esleixiu como au de l’anyada en o sisanta cabo d’anyo d’o naiximiento de SEO Birdlife. Ista entidat, una d’as principals adedicada a l’estudio y conservación d’as aus, la ha esleixida  en estar “una especie muito común, conoixida y vinclada a l’hombre, que ye patindo una fuerte baixada en a suya población en toda Europa”.

Seguntes informa SEO – Birdlife, a población de volandrinas ha reculau un 30 % en a zaguer decada, igual como le ye pasando a atras especies propias d’o medio agrario. Entre as razons ta iste retacule, sinyalan “o despoblamiento rural, que ha feito que os suyos puestos de cría preferius sigan albandonaus u destruyius, u l’emplego intensivo d’insecticidas y atros quimicos en o campo, que acotola o suyo potencial reproductor y saca la suya principal fuent de virolla: os insectos”.

Os datos replegaus por os voluntarios y treballadors de SEO-Birdlife confirman la baixada en o numer d’eixemplars de ista y muitas atras aus. S’han estudiau dica 125 especies vincladas a los medios agrarios. A volandrina dentra asinas en a categoría de menaza de “vulnerable”, chunto a atras aus como o vueitre negro u a cigüenya negra.

Istos datos, quitaus de programas d’aniellamientos entre atros, han permitiu conoixer millor as rutas migratorias d’as volandrinas, qui fan más de 3000 kilometros dende o norte d’Africa. Asinas prebarán d’amilorar tamién os programas de conservación d’a especie, treballando en tot lo suyo recorriu migratorio.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.