A Voyager 1 en a “carretera magnetica” interestelar

A sonda espacial Voyager 1, lanzada en 1977, ha plegau en una "carretera magnetica" que fa de muga entre o nuestro sistema solar y l'espacio interestelar

Voyager 1. Foto: Wikimedia Commons

A 18 mil millons de kilometros (11 mil millons de millas) de distancia d’a Tierra, a sonda espacial Voyager 1, d’a NASA, ha dentrau en una “carretera magnetica” que connecta o nuestro sistema solar con l’espacio interestelar. Iste podría estar un d’os zaguers trangos d’a Voyager en o suyo largo recorriu ent’as estrelas.

“A tamás de que a sonda Voyager 1 se troba encara en l’entorno solar, agora podemos tastar cómo ye l’exterior d’iste entorno por o feito de que as particlas dentran y salen d’ista carretera magnetica”, comenta Edward Stone, qui ye un scientifico d’o prochecto Voyager, en l’Instituto de Tecnolochía de California, o qual ye situau en Pasadena. “Creyemos que ista ye a zaguera etapa en o nuestro camín enta l’espacio interestelar. A nuestra millor estimación ye que se’n troba dende nomás uns meses dica un parell d’anyos de distancia. A nueva rechión no ye o que asperabanos, pero hemos plegau a asperar l’inasperau d’a Voyager”.

Os nuevos resultaus estioron descriptos o 3 d’aviento en a reunión d’a Unión de Cheofisica Norteamericana, que aconteció en San Francisco.

A “carretera magnetica” ye un puesto situau en os leixanos confins d’o sistema solar, a on o campo magnetico d’o Sol se connecta con o campo magnetico de l’espacio interestelar. Ista connexión permite que as particlas cargadas de l’interior d’a heliosfera (a bombolla magnetica que rodia o Sol) se’n aleixen y tamién permite que as particlas cargadas de difuera fluigan ta adintro. Quan a sonda Voyager 1 ye en a carretera magnetica, sensors de particlas colocaus a bordo pueden prener muestras de material dreitament dende dillá d’o nuestro sistema solar.

Dende aviento de 2004, quan a Voyager esnavesó un punto en o espacio clamau frent de choque de terminación, a sonda ha estau explorando a napa externa d’a heliosfera u “heliofunda”. En os zaguers anyos, a velocidat de l’aire solar arredol d’a sonda Voyager ha disminuyiu a zero y a intensidat d’o campo magnetico s’ha incrementau.

D’alcuerdo con os datos de dos instrumentos colocaus a bordo que miden particlas cargadas, a Voyager 1 ingresó por primer vegada en a carretera magnetica o 28 de chulio de 2012. A rechión s’amanó y s’aluenyó d’a Voyager diversas vegadas. A nau espacial ingresó de nuevas en a rechión o 25 d’agosto y l’ambient ha remaniu estable dende alavez.

Datos proporcionaus por a sonda reveloron que o campo magnetico se tornaba mas fuerte cada vegada que a Voyager ingresaba en a rechión d’a carretera, pero, a dirección d’as linias d’o campo magnetico no cambió como os investigadors hesen asperau si a Voyager 1 hese ingresau verdaderament en l’espacio interestelar.

“Somos en una rechión magnetica como garra atra en que haigamos estau antes (aproximadament 10 vegadas mas intensa que antes d’o frent de choque de terminación), pero os datos d’o campo magnetico no amuestran indicios de que sigamos en l’espacio interestelar”, comenta Leonard Burlaga, que ye miembro de l’equipo d’o magnetometro d’a Voyager, en o Centro Goddard ta Vuelos Espacials, d’a NASA, situau en Greenbelt, Maryland.

Aparentment, a salida d’a sonda Voyager 1 d’o sistema solar ha de plegar. Pero a carretera magnetica amuestra o que l’aspera mas entabant.

Vidio d’a NASA: a sonda Voyager 1 viachando a traviés d’a carretera magnetica.

Fuent: http://noticies.sirius.cat/2012/12/la-voyager-1-la-carretera-magnetica.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.