A Voyager 1 ha saliu d’o Sistema Solar

A sonda Voyager 1 ha estau o primer obchecto feito por o ser humano que ha entrau en l’espacio interestelar y, por tanto, ha saliu d'o Sistema Solar, seguntes confirmó o viernes pasau a NASA

Voyager 1. Foto: NASA

Voyager 1. Foto: NASA

Scientificos d’a NASA explican que a Voyager 1 ha cruzau ya a buega magnetica que desepara o Sol, as planetas d’o Sistema Solar y l’aire solar d’a resta d’a Galaxia. L’ha feito 36 anyos dimpués d’a suya partida.

Fa qualques anyos que se charraba si a Voyager 1 heba salida ya d’o Sistema Solar, pero a NASA no l’heba confirmau encara. Dica fa un anyo, a Voyager 1 transitaba dentro d’a heliosfera, una enorme masa de particlas solars que rodia as planetas y las proteche d’as radiacions galacticas. Con tot y con ixo, actualment -ya difuera d’a heliosfera- a nau ye dentro d’un espacio fosco y fredo entre as estrelas.

As bezonas Voyager 1 y Voyager 2 se lanzoron en 1977. A Voyager 1 teneba por destín explorar Chupiter y Saturno, mientres que a Voyager 2 fue ta Urano y Neptuno. Totz dos aparatos continoron emitindo os suyos datos dica que, o 25 d’agosto de l’anyo pasau, Voyager 1 experimentó una caita de bote y boleyo d’as particlas cargadas d’enerchía que se producen dentro d’a heliosfera. Aquí os scientificos asperaban que a dirección d’o campo magnetico dentro d’o espacio s’invertise, confirmando a salida d’o Sistema Solar. Pero isto no pasó decamín: “a Voyager amenistaba tiempo pa analisar as prebas y dar-les un sentiu. Pero agora podemos responder a la pregunta que totz asperabanos: i hemos arribau? Sí, i hemos arribau“, o dició Ed Stone, scientifico y chefe d’a misión.

A Voyager 1, que ye agora a 18 mil millons de kilometros d’a Tierra, dio a la Humanidat as primeras imachens de Chupiter y de Saturno d’amán.

Fuent: http://www.jornalet.com/nova/2364/voyager-1-es-sortit-del-sistema-solar

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.