A XIV Borina por l’aragonés se celebra iste sabado en Zaragoza

Cherardo Callejón: "L'aragonés morirá, pero de cirrosis"

Cartel d'a XIV Borina por l'aragonés

Iste sabado, 12 de mayo, se celebrará a XIV Borina por l’aragonés, empentada por o Ligallo de Fablans y por a Colla d’Actividatz de l’A.C. Nogará- Religada. Iste anyo, a celebración, que como gosa d’estar será de baldes, se ferá en Casa Lambrote (c/Heroismo 36). Prencipiará a las 21.00 horas y bi actuarán Ixera (folk) y Cachirulos XL (folk-rock).

Cherardo Callejón, responsable d’a Colla d’Actividatz de l’A.C. Nogará, ha dito d’a Borina que “ye a millor traza de fer pacha entre as asociacións, de vez que se i esparde a luenga y a cultura aragonesas”. Amás, no solo bi habrá mosica en directo y dj’s de gratis, sino que tamién bi habrá botiguetas, entropans, bingo, buen ambient y bella sorpresa.

A Colla d’Actividatz ye, en parolas de Callejón, “una colla de chent prou activa en l’asociación, que no se conforma con fer-ne parti, sino inquieta, con ganas d’empentar y espardir l’aragonés de muitas trazas.” Y ye que no solo participan en a Borina por l’aragones, sino que tamien en muitas atras actividatz, como, por eixemplo, en as Chornadas d’as Luengas d’Aragón, que se celebrón fa dos semanas en o Centro Joaquin Roncal d’a capital aragonesa y d’as que Callejón diz que o balance ye “muit positivo”, pues encara que as aduyas publicas estión nulas, gracias a l’alta acullida d’a chent, estión, no solo que posibles, sino tot un exito.

Ta qui quiera conoixer más d’amán o treballo d’a Colla d’Actividatz, pueden pasar-se iste sabado a las 21.00 h. por Casa Lambrote (c/ Heroismo, 38), an que a ritmo de rock y folk, nos trobaremos con os sons d’una luenga que no rebla, d’una luenga que, como diz Cherardo Callejón, si muere, lo ferá de cirrosis.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.