Absueltas as cinco personas detenidas dimpués d’a manifestación en Zaragoza d’emparo a Gamonal

Os achents de policia presents ixe diya no han puesto reconoixer a las personas imputadas como as autoras d'os feitos.

Foto: Arainfo

Foto: Arainfo

As cinco personas detenidas dimpués d’a concentración d’emparo d’o vico de Burgos de Gamonal que se fació en chinero de 2014 en Zaragoza han quedau absueltas en no poder contrimostrar-se a suya implicación en os altercaus que bi habió dimpués, d’as que estioron acusadas por o Ministerio Fiscal. O Grupo de Dreitos Civils 15M Zaragoza denunció en o suyo momento a “brutal represión policial” que bi habió ixe diya y la “arbitrariedat d’as detencions”, que “en bell caso se facioron bien luen d’a on que bi habió incidents”, seguntes explican en una nota de prensa.

“No siempre pasa”, afirman en a nota, pero “a Chusticia a la fin ha dau la razón a las cinco personas, que, arbitrariament, estioron detenidas o 17 de chinero de 2014, diya a on que diversos colectivos zaragozanos salioron t’a carrera t’amostrar o suyo emparo a los vecins de Gamonal (Burgos)”.

Dimpués d’o chuicio, celebrau o pasau 18 de chunyo, Dreitos Civils ha conoixiu a sentencia a on que se les absuelve de os delitos de desordens publicos d’os que les acusaba o ministerio Fiscal. “Se les demandaba una pena de dos anyadas de garchola, con accesoria de inhabilitación especial t’o dreito de sufrachio pasivo por o tiempo d’a condena y pinyoras por danyos”, adhibe la nota.

D’as cinco personas, dos d’ellas estioron acusadas de supuestament aventar una papelera contra o vehiclo policial y fer-ie danyos. Atras dos por haber aventau supuestament botellas contra la policía. Y a cinquena persona por haber supuestament crebau os cristals d’un comercio. A chueza d’o Penal numer 5 de Zaragoza, debant d’a falta de prebas que bi habió sobre istas acusacions y debant d’as declaracions d’os Policías que aseguroron no haber visto dreitament a garra d’istas personas crebar u aventar garra obchecto ha decidiu d’absolver a todas ellas. A sentencia asegura que as detencions se facioron momentos dimpués d’os altercaus y que as personas acusadas se trobaban en o puesto a on que heba prencipia a pleitina y concaramiento con a policía y que estioron detenidas quan prebaban de marchar-ne estando encorridas por os achents qui las detenioron.

A sentencia diz textualment que “o resultau d’a preba practicada en o plenario no acredita que a existencia d’os danyos y desordens publicos que efectivament bi habió o 17 de chiner de 2014 con motivo d’a concentración que heba estau convocada ta emparar o vico de Gamonal d’a ciudat de Burgos por diversos colectivos, y ta protestar contra a supuesta represión policial sufrida por as personas que heban estau detenidas en ixa ciudat con ocasión d’ixas concentracions. Manimenos, no ha resultau acreditada la participación d’os acusau en as accions que les imputa o Ministerio Fiscal, y alavez a suya autoría en as infraccions penals por as que se ha formulau acusación (…)”.

Dreitos Civils define a sentencia como “una chicota victoria” dimpués de “meses muito furos ta istas cinco personas que ha feito de chivo expiatorio d’a que estió una multitudinaria protesta que remató con una gran represión policial ta desaloixar bellas carreras d’o vico d’A Madalena”. “Un eixemplo ilustrativo d’o que pasó estió a detención d’una d’a nuestras companyeras. Rematada la manifestación, ella s’endrezaba sola enta casa suya quan estió rodiada por siet antidisturbios. Facioron un rolde, la chitoron por tierra y un d’ells, l’abatanió con a porra, fendo-le moraus de 20 centimetros, entre que le meteban o chenullo en a cara, deixando-la inmovilizada de tot. En a garchola se facioron a mofla d’ella y le faltoron”, detallan en a nota.

A atro miembro de Dreitos Civils “tamién lo detenioron mientres yera gritando a os suyo amigos, a qui heba perdiu dimpués de fer-se una d’as enrestidas, sin mediar parola lo chitoron por tierra, le abatanioron fendo-le un morau en a cara, le metioron contra a paret y lo levoron t’a garchola”, contina o relato d’o colectivo.

Ta rematar, o Grupo de Dreitos Civil d’o 15M denuncia “istas practicas” que consideran “vulneran os dreitos humanos”.

 

Fuent: http://arainfo.org/2015/06/absueltas-las-cinco-personas-detenidas-tras-la-manifestacion-en-zaragoza-de-apoyo-a-gamonal/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.