Acción en Zaragoza contra la reforma sanitaria

L'acción, que s'ha feito hué debant de l'Hespital Miguel Servet de Zaragoza, ha denunciau l'aprobación d'o Real Decreto 16/2012 con o qual “s'elimina o dreito universal a la salut”.

Imachen de l'acción d'iste maitin. (Foto: Álvaro Castrillo)

A Plataforma Contra a Privatización d’a Sanidat en Aragón ha congregau iste maitín a quantas decenas de personas frent t’o Hespital Miguel Servet de Zaragoza con l’obchectivo d’amostrar o suyo refuso a las politicas sanitarias que ye desembolicando o Gubierno de Mariano Rajoy.

Por meyo d’una perfomance, s’ha representau metaforicament o asesinato que o Estau va a cometer contra os milars de ciudadans que quedarán excluius d’o sistema sanitario y o posterior suicidio d’o Ministerio de Sanidat.

L’acción ha denunciau l’aprobación o día 24 d’abril d’o Real Decreto 16/2012 con o qual “s’elimina o dreito universal a la salut”. O suyo manifiesto, encabezau por o lema “la reforma sanitaria convierte a salut en un luxo ta uns pocos”, ha feito especial hincapié en os colectivos que van a estar mas perchudicaus: os immigrants, os mayors de 26 anyos que no haigan cotizau y qui sufran una minusvalía menor d’o 65% y no cobren garra prestación. Gracias a ista reforma, milars de personas, que viven y pagan impuestos en Espanya (como l’IVA, combustibles, alcohol, tabaco), solament podrán recibir atención sanitaria en o servicio d’urchencias.

Dica l’inte, o sistema de sanidat espanyol yera un d’os mas eficients d’o mundo servindo mesmo como eixemplo a atros países, ya que ampraba una cobertura t’o 98% d’a población y gastaba un 20% menos que os de l’entorno europeu.

A Plataforma Contra a privatización d’a Sanidat d’Aragón ye un compendio d’asociacions de vico y organizacions unidas por a esfensa de “una sanidat publica, universal y gratuita, de provisión y chestión publica”. Amás d’as citadas, entre as suyas reivindicacions se troban atras no menos importants como a exichencia d’a derogación d’as leis que permiten privatizar a sanidat, a suya negativa a o copago, a petición de transparencia en as actuacions d’a industria farmaceutica u a redacción d’un Plan de Salut d’Aragón, entre atras.

Fuent: http://www.15mzaragoza.org/2012/05/08/accion-ante-el-hospital-miguel-server-en-zaragoza-contra-la-reforma-sanitaria/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.