Actividatz aragonesas en Barcelona, mosica, teyatro y luenga

Prencipian os cursos d'aragonés en o Centro Aragonés de Barcelona y se cilebra o Despertafolk, trobada cultural de l'antiga Corona d'Aragón

Coinciden en o tiempo bellas actividatz aragonesas en a capital de Catalunya. O Centro aragonés de Barcelona ye un d’os organizadors d’o Despertafolk, a muestra de ripresentacións culturals d’os territorios de l’antiga Corona d’Aragón.  O diya 8 de octobre, en a plaza Joanic de Barcelona, y dende as 12 de ro meyodía  collas de mosica de radiz amostrarán o suyo triballo. Amás se ferán chentas tradicionals. Aragón i será ripresentau por o Grupo-Escuela de Bombos y Tambores del Bajo Aragón d’o Centro Aragonés de Barcelona y por una caldereta de cordero.

Tamién i habrá danzas d’o pais valencian, xeremies catalanas y ambient de chirmandat. Pero no ye l’unico esdevinimiento cultural en que i participa o Centro aragonés de Barcelona, que, un anyo más, prencipia os suyos cursos d’aragonés. Ye o catorceno anyo que en paran istos cursos, an que han estau mayestros chent tant important como Anchel Conte u Pepe Lera.

O 18 d’octobre se presenta o nuevo curso, a las 7 d’a tardi en o mesmo centro Aragonés de Barcelona d’a carrera Costa. En l’acto i habrá mosica y poesia en aragonés. Se fan dos rans, un de basico y unatro d’afundamiento, y se preban de fer un camatón d’actividatz de inmersión lingüística en o taller d’aragonés.

Coincidindo con isto, a companyia de teyatro aragonesa Viridiana presenta en o Sant Andreu Teatre de Barcelona a suya obra Habibi/Amado, finalista en os premios Max d’iste anyo. Dende o 7 d’octobre dica o 12, diya d’o Pilar se feran ripresentacions d’ista obra alacetada en historias y falordias sufís d’os moriscos aragoneses.

Fuent: http://www.centroaragonesdebarcelona.org/

Una rispuesta a Actividatz aragonesas en Barcelona, mosica, teyatro y luenga

  1. Pingback: Actividatz aragonesas en Barcelona, mosica, teyatro y luenga « Cultura « Arredol - La Franja

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.