Actividatz de Nadal en as bibliotecas municipals de Zaragoza

Mientres o mes bi habrá toda mena d'actividatz endrezadas t'adultos y ninos

Biblioteca María Moliner

Biblioteca María Moliner

Mientres a segunda quincena de aviento as bibliotecas municipals zaragozanas han presto toda mena d’actividatz, endrezadas tanto ta ninos como ta adultos.

Os diyas 14 y 21 se celebrará a segunda edición d’o Foto de Literatura t’a catrinalla y chovenalla en Aragón en a Biblioteca María Moliner, endrezada ta toda mena de personas relacionadas con o mundo literario que quieran intercambiar experiencias.

O 14 d’aviento Julio Moreno y Josema Carrasco charrarán sobre “O cuento oral y o comic”. A charrada “Teatro y poesía” que analizará as nuevas trazas d’expresión, plegará o diya 21 de man de l’escritor Adolfo Ayuso y d’os profesors Miguel Arnaiz y Graciela de Torres.

En colaboración con l’Asociación Aragonesa d’Escritors, as bibliotecas organizan tamién o ciclo “L’autor y a obra suya”, una serie de trobadas con bells escritors. O 14 d’aviento prencipiará en o Centro Civico Teodoro Sánchez Punter con Fernando Aínsa, o 16 Angel Guinda, Fernando Sarria y José Garrido charrarán en a biblioteca de Santa Orosia. O 21 remata o ciclo con Pilar Moros, Francisco J. Picón y José Antonio Conde en a biblioteca Rafael Andolz d’o vico de L’Almozara.

Tamién bi habrá exposicions en diferents bibliotecas. Torrero, O Rabal, San Chusé, Delicias, Casco Historico, Almozara y Oliver acullirán a exposición ‘Comic’. Por istas mesmas y a Ricardo Magdalena, en As Fuents, pasará ‘Libros de Nadal’. En l’ACTUR, en a biblioteca Benjamín Jarnés, ‘Protagonistas 2011’ presentará volumens de bells autors que son estaus importants mientres l’anyada.

A catrinalla tamién podrá gronxiar-se con actividatz endrezadas especialment ta ells. Cuentacuentos, actividatz d’animación t’a lectura, teyatro, machia u dovinetas son belunas d’as actividatz programadas. O programa completo se puet consultar en a web d’o concello de Zaragoza.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.