Actos reivindicativos y culturals en o cabo d’anyo de l’asesinato d’o Chusticia Chuan de Lanuza V

Se remera o 422 cabo d'anyo de l'asesinato d'o Chusticia d'Aragón y d'a invasión d'o territorio por as tropas castellanas.

ChustiEn amanar-se lo cabo d’anyo de l’asesinato de Chuan de Lanuza “O mozo”, Chusticia d’Aragón, en 1591, por orden de Felipe II de Castiella, as organizacions nacionalistas y independentistas d’Aragón paran os suyos homenaches y actos cargaus de contenius culturals y reivindicativos.

Iste 422 cabo d’anyo plega con un ambient más furo que no atras ocasions. D’una man a posibilidat ubierta por o Gubierno espanyol de sacar a figura d’o Chusticia, que ha provocau queixas en buena parti d’a sociedat aragonesa, declaracions en contra de CHA y PAR y o prencipio d’una campanya ta que no se torne a “tallar o tozuel a o Chusticia”. D’atra man, l’anuncio d’o referendum soberanista en Catalunya afunda en os problemas d’estructura estatal y d’identidatz nacionals de l’Estau.

Chusto iste miercols, a vicepresidenta d’o gubierno espanyol, Soraya Saénz de Santamaría (PP), ha respondiu a la pregunta d’o diputau de CHA Chesús Yuste, sobre o futuro d’o Chusticia que “no dicen que se saque, sino que siga más eficaz y cabide más diners”

Fundación Gaspar Torrente, vinclada a Chunta Aragonesista, ha organizau qualques actos en istos diyas d’antis d’o 20 d’aviento.  As actividatz en esfensa d’os dreitos y libertatz d’Aragón prencipian iste miercols con a presentación d’o numer 10 d’a revista El Ebro, en o Centro Cultural de Las Armas de Zaragoza. En a revista se i pueden leyer articlos sobre a Reforma de l’Administración local, a realidat trilingüe aragonesa u nueva alportacions sobre l’orichen d’o nacionalismo aragonés. En l’acto participarán beluns d’os escritors como Antonio Peiró, José Luis Soro, Michel Martínez, Gregorio Briz u Bizén Fuster. En Uesca, en a siede de l’Instituto d’Estudios Altoaragoneses, Mark Demesmaeker, diputau flamenco de l’Alianza Libre Europea, ferá la charrada “Confederalismo en la Unión Europea“. En a mesma chornada o Ligallo de Redolada d’a Plana de Uesca de CHA homenacherará a la Plataforma en Esfensa d’a Escuela Publica de Uesca. As chornadas rematarán o diya 20 con un acto d’homenache a Chuan de Lanuza, a o canto d’a suya estatua en a Plaza Aragón de Zaragoza, y un concierto de La Ronda de Boltaña en o Centro Cultural Las Armas de Zaragoza.

Dende l’independentismo de cuchas son convocadas dos concentracions por o movimiento soberanista En a tuya man. En Chaca se ferá o diya 20 a las 19:00 en o Paseyo Constitución, entre que en Zaragoza, a cita será a las 12:00 d’o diya 21, en a puerta d’a Diputación Provincial de Zaragoza. En a convocatoria, En a tuya man esfiende que “no podemos quedar-nos sin fer cosa debant d’a enrestida recentralizadera d’o gubierno d’o PP” y que en “en a nuestra man” un listau d’obchectivos como “a soberanía economica, conseguir un marco propio de decisión, esfender as nuestras luengas u destinar más medios a potenciar una educación, cultura y sanidat publicas, entre atras propuestas. Ta ista convocatoria se i han sumau organizacions independentistas como Purna, A Clau Roya, SEIRA, A Enrestida u Puyalón. Iste partiu, antimás, ha feito publico un comunicau apostando por una compleganza en a movilización soberanista.

O partiu Estau aragonés ha convocau tamién un acto de homenache o domingo 22 d’aviento a las 13:00 debant d’a placa que remera l’asesinato d’o chusticia y a dentrada d’as tropas castellanas en Aragón, chunto a lo Mercau Central de Zaragoza. OSTA, (Organización Sindical de Treballadors d’Aragón) tamién convoca atro homenache, iste chunto a lo monumento d’a Plaza Aragón, o 20 a las 9:20, denunciando “l’actitut centralista de Madrit” y esfendendo “un modelo d’estau que reconoixca toda la diversidat y plurinacionalidat de l’Estau espanyol”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.