Acuerdo ta celebrar a consulta sobre a independencia de Catalunya en 2014

CiU y ERC pactan l'aprebación d'una lei de consultas l'anyo venient y declararán a "sobiranía d'o pueblo de Catalunya" en o primer pleno d'a lechislatura

Catalunya celebrará una consulta sobre a independencia en 2014, calendata de gran simbolismo t’o pueblo catalán. Os liders de CiU y ERC, Artur Mas y Oriol Junqueras, han alcordau que a votación se faiga d’aquí a dos anyos, dimpués de que en 2013 s’aprebe una lei catalana de consultas. Con una mayoría de 71 diputaus sobre 135, as dos formacions tienen prou fuerza ta fer aprebar a lei en o Parlament.

As dos fuerzas tamién han pactau formular una “declaración de sobiranía d’o pueblo de Catalunya” en o primer pleno parlamentario d’a nueva lechislatura.

L’alcuerdo tamién incluye una “negociación y dialogo” con o gubierno espanyol ta fer efectivo o dreito de decidir, que pueda desembocar en una consulta. L’executivo que preside Mariano Rajoy ha dito en anteriors ocasions que as institucions espanyolas nunca no l’acceptarán.

L’alcuerdo implica que ERC emparará a Mas en o debat d’investidura, que se celebrará iste chueves y viernes, seguntes ha anunciau iste mesmo martes a presidenta d’o Parlament, Nuria de Gispert. O candidato de CiU esfenderá a suya candidatura o chueves de tardes.

Consulta en 2014, fueras de que i haiga un alcuerdo ta aplazar-la

O president d’ERC, Oriol Junqueras, ha anunciau que a consulta se ferá en 2014, siempre que os dos partius no consideren que ye millor aplazar-la. Pero, ha dito o lider d’os republicans, fería falta que todas dos fuerzas se metesen d’alcuerdo ta aplazar a votación.

Se preveye que tanto ICV-EUiA como as CUP emparen a convocatoria d’a consulta, con o que i habría a lo menos 87 diputaus favorables a la votación. Totz dos partius, manimenos, han reclamau que qualsiquier alcuerdo sobre o dreito de decidir se prenga en o Parlament, y no como alcuerdo entre partius politicos.

Fuent: http://www.nationalia.cat/ca/noticies/1292

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.