Ada Colau fa cara a os banquers en o congreso espanyol y les califica de criminals

O president d'a comisión ha demandau que retirase a expresión, pero a portavoz d'a PAH ha insistiu

6 febrero, 2013 | Politica | Autor: Arredol | Tweet

Ada Colau, portavoz de PAH (Foto: anticapitalistes.net)

A portavoz d’a Plataforma d’Afectaus por as Hipotecas (PAH), Ada Colau, ha calificau de ‘criminal’ a o secretaire cheneral de l’Asociación Espanyola de Banca (AEB), Javier Rodríguez Pellitero, en a suya intervención en a comisión d’Economía d’o congreso espanyol. O president d’a comisión, Santiago Lanzuela (PP), le ha demandau que retirase a expresión y ha menazau que suspendería a sesión si no lo feba.

Colau ha respondiu que i hai muitas trazas de violencia y de desprecio: ‘A la chent con quí yo soi cada diya nos ha ofendiu fundament a intervención de Pellitero por haber negau o problema‘, en referencia a os desafucios.

As parolas de Colau que han feito carranyar-se a la comisión han plegau dimpués d’a intervención d’o representant d’a banca. ‘Decir que a lechislación espanyola ye estupenda quan i hai personas que se son suicidando por una lei inchusta ye de raso criminal. Les aseguro que no le he chitau un zapato porque quereba explicar o mío punto de gollada. Ye un criminal y l’habrían de tractar asinas, no ye garra experto‘.

Amás, Colau ha meso en dubda a parola de ‘suposaus expertos a os que se da masiau credito’ en relación a o problema d’os desafucios. Y ha calificau de ‘cinicas’ as parolas de Pellitero, que ha esfendiu o sistema hipotecario espanyol. ‘As entidatz financieras son as que han causau o problema y han arruinau a economía d’iste país y, con tot y con ixo, se les contina tractando d’expertos.’

A portavoz d’a PAH tamién ha dito que ‘dimpués d’acotolar todas as vías que ufre o sistema, a ciudadanalla sinyalará en a carrera a aquells que no den emparo a las exichencias de minimos replegadas en a iniciativa lechislativa popular sobre a dación en pago’. Ista frase ha estau interpretada por o president d’a comisión como una menaza y ha quiesto deixar constancia de que la trobaba intolerable.