ADICAE para un modelo de reclamación pa os afectaus por os nuevos horarios de trens rechionals y de cercanías en Aragón

L'asociación de consumidors aconsella de reclamar debant d'a operadora de transportes por a desinformación causada por o cambeo d'horarios

Gara de Delicias (Foto: Wikipedia)

Estación de Delicias (Foto: Wikipedia)

A organización de consumidors ADICAE facilitará un modelo de reclamación a totz os usuarios de trens en Aragón que deseyen de reclamar por os nuevos horarios feitos por Renfe pa rechionals y cercanías.

A supresión de linias y reducción de trachectos que ha aplicau Renfe ha provocau molestias a muitos viachers, que s’han trobau con que o suyo tren ya heba marchau, sufrindo atrasos en os suyos viaches u habendo de fer uso de transportes alternativos como autobuses u taxis, totz ells con pres mas caros que no os d’o servicio ferroviario.

En opinión d’ADICAE, “Renfe no ha proporcionau información sobre un cambeo en os horarios que nian ha estau claro qué día iba a prencipiar”, ya que “ni en a suya web ni en as propias estacions no i heba folletos con os horarios nuevos, y dende fa un parell de semanas en a pachina web d’a companyía reina a confusión, con servicios que amaneixen y desapareixen seguntes quán se faiga a busca”. A situación no ha estau millor en as estacions, an que os consumidors tampoco no i han trobau información suficient y adequada, afirma a organización.

Devolucions

ADICAE recuerda que a información ye un dreito basico d’os consumidors, y que cobra especial importancia en estar charrando d’un servicio publico. Por tot ixo, ista organización recomienda de reclamar no solament o coste d’o billet utilizau istes días, sino tamién o perchuicio economico patiu a conseqüencia d’a desinformación atestiguada por os viachers. Y mete a la disposición d’os mesmos un pliego de reclamación que será en as suyas oficinas de Zaragoza (carrera Gavín, 12).

Asinas mesmo, l’asociación tresladará ista problematica tanto a Renfe como a o Ministerio de Fomento pa que prengan nota de lo ocurriu y actúen en conseqüencia.

ADICAE, que en o suyo XXV cabo d’anyo estendilla ya o suyo ambito d’acción a totz os temas relacionaus con o consumo cheneral, ha anunciau que se mete a la disposición d’interpresa y institucions pa prevenir en o futuro situacions como as vividas istes zaguers días y implementar formulas de chestión y acción que aduyen y satisfaigan a os consumidors en istes casos de cambeos en a prestación d’o servicio.

Fuent: http://www.cronicadearagon.es/wordpress/?p=42389

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.