Afers Exteriors d’o gubierno espanyol zarra quasi de raso os lectoraus

En Rumania u Moldavia, l'aragonés teneba presencia en o programa de lectoraus, que agora tranca

A noticia arribó fa quantos diyas a os lectors que son treballando ta Aecid (Achencia Espanyola ta la Cooperación Internacional y o Desembolique). A la fin, as remors que se yeran sentindo dende lo cambeo de gubierno os presupuestos chenerals de l’Estau se facioron realidat. Han caito quasi totz os lectoraus que bi’n heba en os cinco continents. No han deixau que en os países “ricos y emerchents”: Australia, EE.UU., Canadá, Brasil, India y China.

Os obchectivos d’iste programa yeran la cooperación en campo universitario con universidatz que amenistaban profesors de luenga y que no teneban meyos ta pagar-lis. D’ista traza, pareixe estranyo que o Ministerio de Afers Exteriors no haiga deixau que os lectoraus que son en paises a on as universidatz s’en pueden permitir fer personal docent. O programa yera tamién interesant ta fer veyer atras luengas que no l’espanyol. Eixemplo d’isto en a Republica de Moldavia, en Rumania y en Ucraina se facioron charradas d’introducción a l’aragonés. Tamién se yera treballando en prochectos como a elaboracion d’un diccionario visual de l’aragonés que s’ha vista aturada.

A ista trista noticia cal adhibir-ie que as condicions salarials d’os lectors no yeran guaire dignas. De primeras, no son consideraus como becarios, asinas que no tienen dreito a la cotización ni a l’ature. De segundas, o lector teneba que pagar o que costase o suyo permiso de estancia en os paises difuera a UE. Por ultimo, o salario ye dentre os 1300€ y os 1800€ con una aduya de viache de bells 1000€.

Dimpues d’isto caldra sumar 154 chovens con titolación superior a l’ature que no deixa de puyar seguntes as zagueras cifras oficials.

Una rispuesta a Afers Exteriors d’o gubierno espanyol zarra quasi de raso os lectoraus

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.