“Ahora Aragón En Común” celebra a suya primer asambleya ta construyir una candidatura de compleganza t’as eleccions espanyolas

“Ahora Aragón En Común” celebrará iste martes a suya primer asambleya ta prencipiar o prochecto de construyir una candidatura de compleganza que presente papeleta unica en as eleccions espanyolas de noviembre de 2015

Foto: Arainfo

Foto: Arainfo

O recient clamau movimiento ciudadano “Ahora Aragón en Común” celebrará iste martes, a las 19:00 en o Centro Civico Estación del Norte (Avenida Catalunya, 20, Zaragoza), a suya primer asambleya ta prencipiar o prochecto de construyir una candidatura de compleganza que presente papeleta unica en as venients eleccions ta Cortes espanyolas previstas ta noviembre de 2015.

Iste movimiento, formau por diferents personas a titol particular, surte con a ideya de tornar a meter en practica a metodolochía y ideyas d’as diferents plataformas municipalistas, como Zaragoza en Común, Ahora Madrid u Barcelona en Comú, que “contrimostroron en as pasadas eleccions municipals d’o mes de mayo que ista mena de candidaturas son capables d’emocionar y de movilizar a la chent dillá d’as ya conoixidas siglas d’os diferents partius”, explican en una nota.

“Naixe, tamién – continan, con a certeza de que os resultaus d’una candidatura unica que arrocle a todas as personas y organizacions politicas que treballan por recuperar a soberanía, rechenerar y afundar en a democracia, restutuir a decencia y a transparencia en l’exercicio d’a función publica, defender a universalidat d’os dreitos humanos (educación, sanidat, alimentación, vivienda y trebalo) y establir a dignidat, a igualdat, a participación y a chusticia como principios rectors d’a nueva politica que exichen os retos y oportunidatz d’o sieglo XXI, serán millors resultaus que si os diferents partius politicos se i presientan de traza separada a las eleccions chenerals”.

Por ixo, y prenendo o testigo d’as que consideran as candidaturas municipals chirmanas debantditas, “tanto en l’esprito como en a metodolochía de funcionamiento”, se convoca ista I Asambleya destinada a “poder explicar a la ciudadanía aragonesa o prochecto, a replegar ideyas, y prencipiar a organizar collas de treballo ta poder construyir una sola candidatura, participada por a chent y esleixida con primarias, asinas como ta definir quals serán as linias mayestras d’iste prochecto que prencipia a ixemenar-se por a resta d’o territorio aragonés”.

Fuent: http://arainfo.org/2015/07/ahora-aragon-en-comun-celebra-su-primera-asamblea-para-construir-una-candidatura-de-confluencia-para-las-proximas-elecciones-generales/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.