Aiguas retuertas

Marc Martí

A corrient arrecia. Mils de cuerpos pasan a o nuestro arredol flotando en o suyo suenio autocomplacient. Se dixan levar por a inercia imperant, talment nian s’han planteyau fer frent a la fuerza que les leva ent’a felicidat d’o vacío. No más que uns poquetz se sobaten inquedos, bracean con asperanza y malfurrian as suyas zaguers fuerzas en nadar contracorrient.

O reloch d’arena contina o suyo eterno curso. Pierdes a cuenta d’aquells qu’han sucumbiu a l’incansable maquinaria, a l’imparable empente que pareix no dixar nian un resquicio t’alentar. Muitos son os que momentaneament s’unen ta fer-le frent. Surten proyectos, se combinan ideyas, s’ubren ments que creyan curtos; y no tan curtos, spacios de tiempo en os que pareix qu’amaine a tronada, en os que l’aigua fluye suaument. Puntos d’anclaxe que permiten aglutinar ilusions, barreras a las que se pueden agarrar os cuerpos que despiertan subitament.

A corrient arrecia. A deshumanización de tot, y de totz, s’estendilla igual como un lamparón que disprecia aquello que no tien valor material, aquello que no concuerda con as valors imperants, con o „costumbrismo“ endemico esbrazau de moral que chila de rabia en que no concuerda con as suyas encorsetadas premisas. No existe un atra uellada, no exise visión alternativa, no se permite un atra subchetividat que crebe en piazos a suya falsa obchetividat. Critica, opinion, libertat; conceptos que s’han convertiu en falacias que no son acceptaus que dentro d’o dogma. Cosmovisión que solo permite que amanar-se a la reyalidat d’una traza, con una luenga, con una estreita concepción d’a pluralidat atada a un egocentrismo asfixiant.

A o mio arredol os cuerpos continan flotando sin resistencia, pero de nuevas d’entre ixa maranya d’esmos grisos se convulsionan voluntatz. Una vez más no refuso o suyo chilo, y a penar d’as omnipresents diferencias, uno a mia voz a l’encara suau soniu. Un nuevo islote surte en a rivera, y yo, sin mas pretensión que refirmar os suyos cimients, me sumo a ista montanya d’ilusions que suposa Arredol.

A corrient arrecia. No bi ha millor inte t’apedecar os pietz en o lodoso leito de piedras y convertir-se en un nuevo obstaculo que ature o suyo abán

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.