Albeitars sin mugas presenta una campanya contra a crisi alimentaria

A campanya "Aturen, aquí vive chent" s'ha presentau en Zaragoza con l'obchetivo de sumar refirmes contra as accions que interpresas transnacionals fan en Africa.

Zaragoza ye a tercer aturada d’a campanya “Aturen, aquí vive chent”. D’ista traza se preba de sumar refirmes d’os ciudadans ta salvaguardar a soberanía alimentaria y asinas deixar en mans d’os países a suya politica d’alimentación sin imposicions de difuera. A gara Delicias ye o puesto trigau por Veterinarios Sin Fronteras (Albeitars Sin Mugas) t’amostrar a la sociedat a situación reyal d’os países africans.

“As causas d’a fambre en Africa son causadas, más que más, por accions d’interpresas y gubiernos foranos que fan en o continent african lo que ye viedau en os suyos países d’orichen” ha dito a portavoz de VSF, Julia Tello. Una d’as fins d’ista campanya ye desichir a lo Ministerio d’Afers Exteriors que prenga as midas que calga ta impedir que as interpresas transnacionals se implanten en os países y modifiquen a vida d’as suyas chents.

Ista campanya amuestra de traza más especifica a situación de Senegal, Mozambique y Uganda, ya que a presencia d’istas interpresas en istos países ha levau conseqüencias negativas t’as poblacions suyas. En Senegal, a flota maritima forana ye acotolando a pesca t’os habitadors, y se preveye que en quince anyadas ya no bi’n haiga en Africa. Mozambique y Uganda tamién son sufrindo as secuelas de l’asetamiento d’as interpresas foranas, ya que istas treballan as suyas tierras, prencipal meyo de vida en istos países.

Dica 1970 Africa yera autosuficient, pero en l’actualidat ha d’importar o 25 % d’a virolla suya, ya que ha perdiu a suya Soberanía Alimentaria que representa o dreito a esleixir a suya politica alimentaria. “A fambre no ye un problema de capacidatz sin de voluntat politica”, denuncian dende a ONG.

Fuent: Aragon2.com

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.