Alcanzau un alcuerdo pa que Podemos presida as Cortes d’Aragón

Violeta Barba –actual vicepresidenta- será a nueva presidenta d'a Mesa d'as Cortes d'Aragón. A vicepresidencia será agora pa lo PSOE

Violeta Barba en una intervención en as Cortes. Foto: Cortes d'Aragón

Violeta Barba en una intervención en as Cortes. Foto: Cortes d’Aragón

“Dimpués d’un anyo de labor parlamentaria dentro d’as Cortes d’Aragón y a la luz d’os zaguers escayecimientos en o Parlamento iste verano”, PSOE, Podemos, IU Aragón y CHA, han aconseguiu “un alcuerdo pa seguir mantenendo una Mesa d’as Cortes d’Aragón de caracter progresista”, asinas reza o comunicau ninviau por as quatro fuerzas politicas en que se rubrica l’alcuerdo aconseguiu.

Con dito alcuerdo, y seguntes reconoixen os distintos grupos parlamentarios, “se posibilita una mayoría progresista en a Mesa d’as Cortes d’Aragón”, y “se materializa en os apoyos que istas quatro fuerzas politicas s’atorgan pa la obtención d’a Presidencia y a Vicepresidencia d’o Parlamento aragonés”.

As quatro formacions han alcordau que a candidata de Podemos, Violeta Barba, sía qui releve a Antonio Cosculluela (PSOE) en a presidencia d’a Mesa d’as Cortes. A vicepresidencia, que actualment la ocupaba Barba, será agora pa lo PSOE.

Con ista composición d’a Mesa d’as Cortes d’Aragón “se favoreixerá a tramitación de todas as propuestas y leis que respondan a totz os retos d’o Parlamento en un futuro proximo, con una achuga clara en profundizar en a recheneración y a obridura d’as Cortes”. Antiparte, “as quatro fuerzas progresistas anuncian o suyo compromís de seguir mantenendo conversacions a fin de materializar atros posibles alcuerdos en os proximos días”, han sinyalau.

Fa unos días, dende CHA realizaban un clamamiento a la responsabilidat “y a tener a madurez politica suficient, pa, entre totz, sin imposicions y con dialogo constant, aconseguir os alcuerdos a quatro en Aragón”. Amás, insistiban en “fer iste esfuerzo de dialogo, entre totz os partius, pa poder atender a las demandas d’a ciudadanía, que amenista de mas respuestas y menos disputas”. Bella cosa que finalment ha ocurriu con a sinyatura d’iste alcuerdo.

Por a suya parte, o portavoz d’o grupo Parlamentario Socialista, Javier Sada, destacaba que l’obchectivo prencipal consistiba en “analisar os abances en os compromisos que s’adquirioron con os aragoneses”, pa poder “abanzar en a recuperación de politicas socials, empentar a economía real y plegar en grans alcuerdos en materias como Educación u Universidat”.

A mesa d’as Cortes d’Aragón ye integrada por dos deputaus d’o PSOE, dos d’o PP y un de Podemos.

Fuent: http://arainfo.org/alcanzado-un-acuerdo-para-que-podemos-presida-las-cortes-de-aragon/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.