Alcuerdo entre AUZSA y o Concello de Zaragoza pa meter fin a o conflicto laboral

125 treballadors serán readmitius en un plazo de dos anyos. O comité mantiene a vaga asperando l'alcuerdo definitivo

Foto: ffuentes (CC-BY)

Foto: ffuentes (CC-BY)

Autobuses Urbanos de Zaragoza (AUZSA) y o Concello de Zaragoza arriboron ahiere a un alcuerdo respective a la solución d’o conflicto laboral que ha levau a la vaga indefinida a la plantilla de dita interpresa debiu a la decisión d’AUZSA de fer fuera a 153 treballadors, 125 forzosament.

Seguntes l’alcuerdo, as 125 personas forachitadas serán recolocadas en un plazo maximo de dos anyos, gracias a la reducción d’horas extras y chubilacions, ixamplando en 500.000 kilometros o recorriu d’os autobuses dende l’1 de chinero de 2014. Una trentena de treballadors tornará a os suyos puestos de treballo en chinero, encara que perdendo l’antigüedat que teneban.

En a reunión en que s’ha arribau a l’alcuerdo han participau o vicealcalde Fernando Gimeno, a consellera de Servicios Publicos y Movilidat Carmen Dueso y o director cheneral d’o Grupo Avanza Jesús López Torralba.

Mientres os representants politicos y interpresarials demandan a fin d’a vaga, o comité d’interpresa aspera l’alcuerdo definitivo. O comité denuncia que l’alcuerdo entre concello y interpresa ye nomás verbal y amuestran a suya preocupación por no estar escrito. Asperan a comunicación oficial d’a dirección d’AUZSA y una reunión con a interpresa en venients diyas. Tanimientres, a vaga se mantiene.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.