Alemanya: os esqueferaus habrían d’estalbiar en carne y vender os suyos muebles

As recomendacions son en un folleto de l'achencia nacional d'emplego O subdirector de dita achencia creye que ye un impreso “estupendo”

oficina ature alemanya

Oficina d’ature en Alemanya. Foto: Wikipedia

A oficina de l’achencia nacional d’emplego en a ciudat alemanya de Pinneberg plega de publicar una guida a on amuestran a estalbiar a personas en ature. Entre os consellos d’o cuadernet amaneixen recomendacions sobre cómo deixar de minchar carne una semana u vender muebles en os mercadetz. Beber nomás augua d’a ixeta y duchar-se a escape son atros d’os consellos que pueden leyer-se en dita guida. Tamién recomiendan fer casamuda a una vivienda menor y mas barata.

No habría pasau d’estar una recomendación desafortunada d’una oficina d’emplego local en una chicota ciudat alemanya si o subdirector de l’achencia nacional d’emplego alemanya Heinrich Alt no l’hese calificau d’estar “una guida estupenda”  en a suya cuenta de Twitter.

Os esqueferaus de larga duración, ye decir, dende o segundo anyo, asinas como aquellas personas que no haigan treballau nunca, tienen dreito en Alemanya a una aduya no contributiva que contempla o pago de l’alquiler y una chicota suma de subsistencia que ronda os 350 euros. As personas pueden, asinas mesmo, treballar dica ganar 100 euros mas.

Pa accedir a istas aduyas no contributivas no se puede poseyer garra mena de biens u estalbios. Aquells que tienen una casa en propiedat, por eixemplo, se veyen en muitos casos obligaus a vender-la. Choyas y atras posesions que sían susceptibles d’estar vendidas deixan de perteneixer a l’esqueferau. Tampoco no se puede recibir diners regalaus de familiars u amigos. L’achencia d’emplego puede mandar a casa d’o esqueferau a un controlador que tien dreito a revisar toda a casa en busca d’obchectos “inadequaus” en a suya nueva situación vital.

Tamién s’han sentiu casos en a prensa de treballadors d’a oficina d’emplego que controlan a os esqueferaus en a carrera, en o supermercau u que cusiran a suya caixa de correus pa comprebar si realizan gastos difuera d’o normal u si se’n van de vacanzas sin pedir permiso a l’achencia nacional d’emplego.

Una d’as pocas cosas que pueden poseyer os perceptors de ditas aduyas son os suyos muebles orichinals y os diners resultants d’a venda d’os mesmos en o caso que se desfaigan d’ells.

Iste sistema d’aduya social en pagas de prestacions que han de realizar os esqueferaus en forma de treballo y con sancions caso que no cumplan o que dicte a oficina d’emplego ha estau denunciau en numerosas ocasions. Una d’as suyas detractoras mas conoixidas ye Inge Hannemann, treballadora d’una oficina d’emplego en o vico d’Altona en Hamburgo. Ella creye que o sistema ye anticonstitucional porque a carta magna asegura en o suyo primer articlo a todas as personas una “dignidat” que ella veye chafada por medio d’iste sistema. Hannemann ha estau retirada temporalment d’o suyo treballo y pretende de levar a qüestión a o Tribunal de Dreitos Humanos d’a Unión Europea.

Fuent: http://www.eldiario.es/internacional/Alemania-parados-deberian-ahorrar-muebles_0_155734629.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.