Alemanya saca as zaguers tasas universitarias

Os dos estaus alemans que manteneban as tasas deciden de sacar-las. Bavera destinará 421 millons d'euros más ta educación

Facultat d'Humanidatz d'a Universidat de Bayreuth, en Bavera. Foto: Wikipedia

Facultat d’Humanidatz d’a Universidat de Bayreuth, en Bavera. Foto: Wikipedia

Os estudiants que se matriculen en una universidat de Bavera o venient hibierno no habrán de pagar tasas universitarias. Asinas lo anunciaba la versión d’o sur d’o partiu d’a canciller Angela Merkel, a Unión Cristianodemocrata (CSU), que gubierna l’estau en chunto con os liberal d’o FDP, igual como l’estau federal. Ta ixo, Bavera destinará 421 millons d’euros ás t’amostranza. 219 irán t’as universidatz ta compensar-ñas por a baixada d’ingresos que producirá ista mida.

Encara no ha pasau una decada dende que as matriclas de metioron en Bavera, a rechión que rechistra os ingresos más alteros d’o país. En primeras, se planteyó de fer un referendum ta que os ciudadans podesen decidir sin mantener as matriclas u sacar-las. Más d’un millón de baverans se rechistroron en as listas electorals en nomás dos semanas. As zaguers encuestas aseguraban que tres de cada quatres baverans yeran a facor de sacar as tasas. Talment por ixo, y porque se amanan as eleccions de setiembre, a CSU s’ha veniu a plego y a universidat torna a estar de baldes en l’Estau.

En 2002 a nueva lei d’universidatz viedaba a ran nacional a posibilidat de meter un pago de matriclas ta estudiar en a universidat. Siet estaus alemans recurrioron ixa mida. Consideraban que l’Estau central s’heba extralimitau en as suyas funcions y que a politica d’educación superior heba d’estar competencia de cada Estau. Tres anyadas dimpués, o Tribunal Constitucional les dio la razón y imposoron tasas academicas a los estudiants que se matriclaban en as suyas rechions.

Dende alavez, nomás dos d’ixos estaus las manteneban: Bavera y Baixa Saxonia. En Hesse, las sacoron en 2008, en Sarre en 2010, en Renania d’o norte-Westfalia en 2011 y en Baden-Wurtemberg y Hamburgo se pagoron dica l’anyada pasada. En atros nueu estaus alemans nunca no s’ha pagau por as matriclas d’a universidat.

Seguntes encuestas d’a institución universitaria ta l’asistencia social d’os estudiants, (Studentenwerk), nomás un 11-14% d’os fillos de pais con ingresos baixos plega en a universidat, entre que en o caso d’as rentas más alteras, a cifra plega en o 83%. En as casas más modestas nomás 36 de cada cient zagals remata o bachillerato. Ista polarización social en l’amostranza superior ye a razón por a que una parti d’o movimiento antiBolonia y antitasas demanda o pago de tasas en función d’a renta, asinas como que se saquen nomás en os casos d’os ingresos más baixos.

O columnista Christian Füller citaba a Marx en o periodico Tageszeitung, remerando que o filosofo ya en 1875 criticaba que a universidat estase de baldes en o programa d’o partiu socialista con istas parolas: “Si en bells estaus as institucions d’educación superior estasen de baldes, ixo nomás significaría que as clases alteras mantendrían a suya educación a costa d’a pocha d’os impuestos d’a comunidat”.

Debant ixa cita, se cheneró un debat sobre o contexto d’a mesma, ya que en o sieglo XIX os treballadors pagaban unos impuestos más alteros en proporción a los d’agora y o porcentache d’estudiants de orichen más pobra yera encara más chicot. D’atra man, o partiu socialista proposaba con dito programa que l’amostranza estase de baldes en todas as suyas fases, no nomás a universitaria, antimás de meter impuestos progresivos.

Os comités d’estudiants d’as universidatz se han manifestau mientres todas istas anyadas ta que no se pagasen matriclas y viyen como una victoria que se saquen. Critican, manimenos, o nuevo sistema d’ampres personals y que s’haiga baixau o numer de becas. O chefe d’a conferencia de rectors, Horst Hippler, crei que o pleito tornará t’actualidat en bell par de cursos porque no bi ha prou financiación estatal t’as universidatz. De feito, dimpués de que dimitise a ministra d’Educación por o plachio d’a suya tesi doctoral, a nueva ministra Johanna Wanka, ha asegurau que prebará de tornar a meter-las en 2017.

 

Fuent: http://www.eldiario.es/internacional/Alemania-acaba-matriculas-universitarias_0_110939227.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.