Alsacia votará en referendum en abril a fusión d’os suyos tres consellos territorials

Si s'apreba, o consello rechional y os consellos chenerals d'Alto Rin y Baixo Rin convercherán en una mesma colectividat con siede en Estrasburgo

Catedral de Notre Dame en Estrasburgo, capital d'Alsacia (Foto: Wikipedia)

Catedral de Notre Dame en Estrasburgo, capital d’Alsacia (Foto: Wikipedia)

O 24 de noviembre, en Estrasburgo, os miembros d’o Consello Rechional d’Alsacia y d’os consellos chenerals d’Alto Rin y d’o Baixo Rin decidioron de fer trangos ta creyar una nueva colectividat que sustituyise os tres consellos. A decisión se prenió en o clamau Congreso d’Alsacia por 108 votos a favor, cinco en contra, d’o Frent Nacional, y nueu abstencions. A creyación d’una sola colectividat en o territorio chermanofono d’Alsacia, con siede en Estrasburgo, se someterá a referendum o 7 d’abril venient y, si s’apreba dentrará en funcionamiento previsiblement en 2015.

A fuella de ruta marcada por o Congreso d’Alsacia se refirma en a lei d’o 6 d’aviento de 2010, que permite a una rechión y a los departamentos que’n fan parti, fusionar-se ta creyar una colectividat unica que chestione todas as competencias. Tamién se quier beneficiar d’o traspaso de competencias descentralizadas. En o caso alsaciano, os argumentos d’a fusión son a proximidat y a eficacia.

Densament poblada (1,8 millons de personas) y con una superficie relativament chicota (8.280 km2), muitas voces consideraban que trestallar Alsacia en dos consellos chenerals yera anacronico y caro. Antimás d’a eficacia y a proximidat, se prevei que a fusión ferá cabidar, en achiquier-se entre o 10% y o 20% o numer d’esleixius y de personal. Tamién bi ha qui pronostica que l’eixemplo alsaciano será seguiu por más rechions francesas.

 

Fuent: http://www.vilaweb.cat/noticia/4066347/20121219/alsacia-votara-referendum-labril-fusio-seus-consells-territorials.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.