Amnistia cuaterna abusos “impunes” y “cutianos” d’a Policia espanyola

Denuncian as actuacions d'a policía en as manifestacions

Foto: Arainfo (CC-BY-SA)

Foto: Arainfo (CC-BY-SA)

A organización de dreitos humanos Amnistía Internacional (AI) ha presentau iste chueves un nuevo informe a on que se cuaterna l‘emplego “excesivo” d’a fuerza de man d’a policia espanyola contra manifestants pacificos y alerta de que o dreito a la protesta ye “menazau”.

“A policia actua con impunidat de tot, entre que os manifestants pacificos y os liders d’os movimientos socials pateixen un acoso perén y son estigmatizaus, abataniaus y, bellas vegadas, detenius ta concarar cargos penals, engarcholamiento y pinyoras”, ha denunciau Jezerca Tigani, directora adchunta d’o Programa ta Europa y Asia Central.

L’informe, titulau “Espanya: o dreito a protestar menazau” se suma a varios documentos  que a organización ha iu publicando dende que creixioron as protestas ciudadanas en 2011. En 2007, con tot y con ixo, AI tamién tocó lo tema d’a impunidat policial y os malos tractos con l’informe “Espanya: Sal en a nafra. Impunidat policial dos anyada dimpués”. Dende alavez, alerta la organización, bi ha habiu pocos trangos entabant.

AI destaca que bi ha habiu casos de “sobos, detencions, procesamientos y pinyoras contra manifestants“. A organización replega en l’informe o testimonio de qualques personas que han estau abataniadas y mesmo mutiladas, como ye o caso d’Ester Quintana, que perdió un uello por o trucazo d’una bala de goma mientres una protesta en Barcelona en 2012, u lo d’o Consuelo Baudín, que estió en momentos de perder a vista mientres atra marcha en Madrit, a mesma anyada. En totz os casos, AI denuncia que prima la impunidat y a falta de reparación a las victimas.

Atra d’as actuacions denunciadas por a organización ye que se fan servir masiau as pinyoras, que en o suyo conchunto cifran en 300.000 euros nomás en Madrit. “Se fan de traza inchustificada pinyoras administrativas a organizadors y participants d’as protestas, antimás d’identificacions masivas”, ha remarcau Virginia Álvarez, responsable de Politica Interior de AI Espanya. A pinyora, denuncian, plega dos meses dimpués y t’o manifestant ye dificil d’esfender-se porque se da mayor credibilidat a la policía.

Debant d’os casos cuaternaus por AI, Anja Bienert, miembro d’o programa de Policía y Dreitos Humanos de Amnistía Internacional, ha advertiu que “somos en un camín perigloso“, un “rolde vicioso de puyada d’a violencia” a on que se pueden repetir situacions como las que s’han viviu en Grecia, Turquía u Ucraína.

Biener ha estau muito critica con a policía y ha recomendau a las fuerzas de seguridat no perder a “confianza” y o “respeto” d’os ciudadans con actuacions desproporcionadas. “Una manifestación que remata en violencia ye o fracaso de l’Estau”, ha rematau.

Cuanto a los protocolos que fan servir as Unidatz d’Intervención Policial (UIP) t’actuar en manifestacions, Virginia Álvarez ha asegurau que ni dende o Gubierno ni dende os sendicatos policials les han facilitau garra documento d’ixa mena. “Sospeitamos que no existe”, ha dito.

Fuent: http://www.lamarea.com/2014/04/24/amnistia-denuncia-el-uso-de-la-fuerza-excesivo-habitual-e-impune-de-la-policia-espanola/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.