Amnistía Internacional acusa a la Chusticia de no estar “imparcial ni efectiva” con os abusos policials en manifestacions

A ONG desembolica en un informe casos concretos d'emplego inchustificau d'a fuerza en manifestacions d'o 15M en Madrid u Barcelona, antimás de en movilizacions contra as retalladas en Grecia y Rumanía.

Manifestants y Guardia Civil en Artieda o pasau diya 10

Manifestants y Guardia Civil en Artieda o pasau diya 10

A organización Amnistía Internacional ha publicau iste chueves un informe a on que documenta abusos en as intervencions policials contra manifestacions pacificas en Espanya, Grecia y Rumanía. L’equipo d’investigadors d’a ONG ha constatau que os metodos policials “no siempre cumplen as normas internacionals” y reafirma lo que amuestran videos y fotografía puyadas ta Internet mientres istos meses por os ciudadans: “en muitos casos, os achents han trucau terne que terne con porras a manifestants pacificos, mesmo en o tozuelo y en o cuello, fendo-les lesions graus”, diz o texto.

Ta Amnistía Internacional bi ha un atro feito grau: ” as investigacions criminals d’as denuncias” que han presentau os agredius, diz l’informe, “no son estadas exhaustivas, imparcials ni efectivas”, en os casos que s’ha plegau a prencipiar; “en atros sisquiá s’ha ubierto una investigación”. Ixa inseguridat churidica que denuncia la ONG tien como conseqüencia que “en no haber-ie una mayor rendición de cuentas d’a policía, se faigan nuevos abusos”. Se reconoix, ixo sí, que o treballo d’os achents no ye sencillo en as grans concentracions.

A organización ha anunciau en rueda de prensa que prencipiará una investigación independient sobre as enrestidas policials en a gara d’Atocha dimpués d’a disolución d’as concentracions frent a lo Congreso o 25-S. En l’acto de presentación de l’informe tamién ha preso a parola Gabril Jiménez, qui contó en eldiario.es a suya experiencia en estar deteniu por os antidisturbios y, seguntes o suyo testimonio, que le ficasen “zaborros en a mochilas” ta chustificar o suyo traumatico paso por comisaría.

Ta fer l’informe, Amnistía Internacional ha revisau “videos, fotografías, articlos de prensa y testimonios de testigos que dicen indican que a policía fació terne que terne masiau emplego d’a fuerza”. Y bi charra de calendatas concretas: 15, 28 y 29 de chunio de 2011 en Atenas, Grecia u 27 de mayo de 2011 en Barcelona. Ixos documentos “amuestran a achents de policia enrestindo con porras y disparando bolas de goma contra manifestants que no pareixen representar garra menaza”, afirma Amnistía Internacional.

Como gosa d’estar cutiano en os informes d’a organización, se i explican casos personals concretos ta fer eixemplo d’a suya acusación. Casos como o d’Ángela Jaramillo, una muller de 58 anyadas qui participó en a manifestación d’o 4 d’agosto de 2012 en a Puerta del Sol, a on que se produció una d’as primers enrestidas policials contra o 15M dende que se devantó l’acampada de Madrid. Dimpués de recibir un trucazo con un escudo de policía entre que yera tranquilament con as mans puyadas, reconta Ángela en l’informe, una colla de manifestants bi acude t’aduyar-la. “En ixe inte, a colla de policía se chira”, reconta Ángela, “recula, se’n vien enta nusatros y prencipia a foter-nos atra vegada con as porras”. O testimonio completo de Ángela Jaramillo puet leyer-se en o blog d’Aministía Internacional en eldiario.es.

Emplego indebiu de balas de goma y atras armas “menos letals”

O informe pena que os gubiernos europeus no se metan d’alcuerdo en unas directrices “sobre o disenyo y l’emplego d’o que clama armas “menos letals”, ye decir, “que no son de fuego”, pero que “tienen o potencial d’estar letals”, como sustancias quimicas irritants (gases ta plorar), balas de goma u “granadas paralizants”, como la que deixó ixordo de tot a lo periodista Manolis Kypreos o 15 de chunio en Atenas. Habió d’operar-se ta recuperar parti de l’audición, pero “encara le cuesta caminar por a falta d’equilibrio”.

Agresions a periodistas

O informe d’Amnistía Internacional reconta o caso de Paloma Aznar, colaboradera de El País u Interviú, entre atros meyos. Podría charrar-ie tamién d’o caso de Lidia Ucher u Jonás Candalija; u Patricia Horrillo; u Gabriel Pecot; u Gorka Ramos; u Ángel Calleja; u un largo etc de periodistas retenius u agredius a tamás de levar a suya acreditación de prensa y, en bellas ocasions, estar fendo o suyo treballo. En o caso de Aznar, o chuez que revisó a suya denuncia a lo policía que le trucó, “encara que os feitos podrían estar delito, no se puet identificar a lo responsable”, seguntes l’informe. Una anyada dimpués, tornó a estar agredida en as manifestacions de miners de Madrid.

Como rematadera, Amnistía Internacional clama a la reflexión a las autoridatz europeas, a que comprendan que “en l’actual clima de crisi economica y imposadura de midas d’austeridat” as manifestacions se faigan muito asoben. En ixe scenario, “a policía gosa d’estar o brazo más visible de l’estau”.

En l’alpartau de recomendacions, Amnistía Internacional suchiere, entre atras cosas, que as reunions publicas no sigan consideradas como “l’enemigo”.

 

Fuent: http://www.eldiario.es/sociedad/Amnistia-Internacional-documenta-policiales-manifestaciones_0_61594276.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.