Amnistía Internacional diz que as torturas en Espanya no son “casos isolaus”

A organización creye que o primer trango ye "reconoixer a reyalidat d'a tortura y os malos tractos"

Amnistía Internacional suspende en un comunicau a l’Estau Espanyol a la hora de fer investigacions d’as torturas y atros malos tractos sufrius de man d’as fuerzas y cuerpos de seguridat. “Entre mayo y chulio d’ista anyada, dos tribunals diferents y un organismo d’a ONU han fallau contra l’Estau espanyol por no fer investigacions efectivas ta saber si son verdat u no pas, as denuncias de torturas presentadas por tres ciudadans”, remeran.

Os casos referius por AI son os de Orkatz Gallastegi y Ruben Villa, qui presentoron denuncias por tortura. Os dos estioron en rechimen de incomunicación lo que, seguntes ista organización y bells organismos internacionals, favoreix a tortura. O tercer caso, que antimás tien un component racista ye o de Beauty Solomon, ciudadana d’orichen nicheriano qui estió agredida fisicament y vebal en Palma de Mallorca por dos achents d’a policía que le demandoron a identificación. En iste caso o Tribunal Europeu d’o Dreitos Humans condenó a l’Estau Espanyol a pagar a Beauty a cantidat de 30.000 euros.

Seguntes AI “·Feitos como istos contrimuestran que , quan en Espanya bi ha un caso de presuntos malos tratos o proceso gosa estar siempre o mesmo: no bi ha investigación d’o sucediu u si bi’n ha ye inadecuada y s’archiva a escape toda denuncia chudicial por manca de prebas, memso si bi ha datos medicos u atros indicios creyibles que la refirmen. Si se leva o caso a chuicio ye imposibles identificar a los achents responsables”.

Con tot y con ixo Amnistía Internacional no creye que a tortura siga sistematica en Espanya encara que tampoco no “son casos isolaus”. Son “eixemplos de defectos estructurals”. Antimás creye que cal concarar a inmunidat d’ista mena de comportamientos”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.