Amparo Sánchez: “Qui somos vivindo d’a mosica somos uns afortunaus d’a vida”

Arredol entrevistó a la cantaire en una charrada concierto organizada por Caracol Zaragoza

amparoAmparo Sánchez, ex cantaire d’Amparanoia, estió actuando o pasau 18 d’abril en una sesión muito intima a on que presentó belunas d’as cantas d’o zaguer disco “Alma de cantaora” y tanyó bellas quantas de toda a suya trachectoria profesional. Lo fació aintro d’un acto a on que bellas personas d’o Caracol Zaragoza – Rete de personas por l’autonomía zapatista recontoron como ye a situación en Chiapas y en as comunidatz en rebelidía y dioron treslada d’as zaguers noticias.

Amparo concedió a Arredol una entrevista que, por demanda suya, le faciemos en aragonés, amostrando-se prou intresada en os afers lingüisticos.

Viens ta Zaragoza por una causa Zapatista, muitas d’as cantas tuyas charran de iste afer, i yes estada, faciés un documental… ¿Qué ye ta tú ista luita zapatista?

Ta yo estió un movimiento que m’enamoró dende o primer inte. Ixe primer inte estió en l’alzamiento, en o 96, que antimás ye l’anyada que vien a vivir ta Madrit Manu Chao con os mosicos suyos y estioron ells qui prencipioron a charrar-me d’o zapatismo. Alavez yo me’n iba t’a hemeroteca a mirar-ie noticias porque quereba saber, pero no i trobaba lo que quereba saber.

Ent’a fin d’o 99 decido de fer un viache con dos amigas y fuemos ta Mexico, t’o D.F., y nos i quedemos con chent que t’a part d’alavez yeran treballando en “La Jornada” y que yeran a la tisva de tot lo que ye o movimiento zapatista. Alavez toda la información que tanto m’aganaba de tener, la teneba en ixa casa.

Astí ya m’enamoré de tot. A los pocos meses yera la caravana zapatista y bi torné. Astí ya paré cuenta de que o mio compromís yera total y ta cutio. En 2005 tenié a suerte de planeyar un viache. En primeras, no bi iba que yo y bells amigos, pero a la fin se me unió una productora que quereba fer un documental sobre as radios zapatistas, y a la fin o documental estió sobre iste viache.

Estiemos en “La realidad” [Un d’os “caracols” zapatistas]. Estió una experiencia impresionant. Me viyé astí, cantando todas as cantas que heba escrito ta ells, como “Somos viento”. Encara que ixa no estió a primera que canté. D’antis facié rancheras y corrius mexicanos. Os ninos me demandaban “La de la mochila azul”. Me los habié de ganar primer dica que tanyé as cantas que heba feito pensando en ells, porque son indichenas, tienen atra traza de entender a vida y has de comunicar-te d’atra traza.

Nos los ganemos, y a Chunta de Buen Gubierno nos deixó de fer-ie un gran concierto. Una colla de cumbia d’astí nos ampró l’equipo de soniu. I faciemos una gran chenta. I baixó chent de toda la selva y a verdat ye que estió una trobada maravillosa.

En o documental no sale guaire porque nos demandoron que no gravasenos porque no iban a portar-ie o mocador y yera más una fiesta d’entre nusatros. Alavez, isto no apareix en o documental, pero ta yo estió l’inte clau.

Ye un movimiento que m’intresa muito y lo sigo de contino. Mesmo quan son en silencio que no dicen cosa, aprofeito ta releyer libros, ta mirar información d’atros movimientos. Agora que han tornau a clamar-nos, aquí somos una atra vegada ta que se sepa lo que son fendo-ie.

¿Qué nos pueden amostrar os zapatistas a la chent d’Europa?

Lo primer de tot, o gran eixemplo de dignidat y de resistencia. Antis d’a rebelión yeran de tot ixublidaus por o gubierno y as institucions. Yeran prebando de conservar a suya cultura, a suya luenga, a suya traza de vivir. China chana prencipioron a chuntar-se y a soniar un mundo chuntos.

Creigo que de bella traza ixo ye lo que ye pasando aquí agora. Pasó con a primavera arabe y ye pasando aquí. A chent se ye prencipiando a chuntar y a preguntar-se “¿Y si podesenos fer as cosas d’atras trazas?”

Ells tienen a suerte d’estar en a selva. Encara que tienen muitisma presión y no ye facil. Tamién totz os muertos y totz os desapareixius quedan impunes tamién en estar en una selva.

Cal remerar que ye una selva que o gubierno les dió, a on que dengún no quereba ir. Ells se bi instaloron y prencipioron iste suenio que ye o zapatismo, que ye recuperar l’esprito de Zapata. Bi ha muitas frases clau: “ta totz tot, cosa ta nusatros”, sería a frase más sinyalera y que se puet exportar ta tot lo mundo. Ells tamién dicen que “O pueblo ye qui manda y o gubierno obedeix”. No puet estar de revés. Somos mayoría. Ixos podrían estar os dos prencipios basicos ta fer un mundo nuevo.

Dende o 97 que faciés o primer disco ¿qué cosas creyes que han cambiau a millor y quals a pior en o mundo d’a mosica?

A millor, que agora tenemos una finestra que ye internet a on que amostrar-nos y treballar a nuestra autochestión. Yo prencipié en o 97 y no tenebanos web. Dende o 2000 que teniemos web d’Amparanoia, prencipiemos a recibir ufiertas y mensaches de tot lo mundo.

Yo siempre aposté muito por salir a tanyer ta difuera. Prencipiemos a ir muito ta Francia con Sargento García y tot ixe movimiento que bi heba alavez. Pero estió dende 2000 que prencipiemos a viachar por o mundo y muitos d’ixos contactos plegoron por a web.

Agora os retes socials son atra finestra ta compartir. Iste concierto que hemos feito ista nueit aquí, lo charremos a semana pasada no hese estau tan maravilloso y no bi hese habiu tanta enerchía con toda ista chent si no hesen existiu totz istos retes socials que se comunica tot de camín. En politica pasa igual a on que se viye a capacidat de movilización d’a chent gracias a istas tecnolochías.

De parti mala no’n trobo. Qui somos fendo mosica, yo a lo menos, me considero una afortunada d’a vida. He de luitar, igual como luitamos totz, pero soi una afortunada. Yo amo lo que foi. Amo escribir cantas, amo cantar-las, amo fer prochectos t’atros como qualcosa repolida… Prou que hemos de luitar y barallar pero ¿qui no ha de fer-lo en istos diyas?… Bueno, os banquers son los unicos, ¿no?.

Internet tamién nos permite viyer y conoixer mosicas de tot lo mundo que no conoixerianos d’atras trazas y muito facil.

Todas istas anyadas de mosica han deixau muita influyencia en atras collas y en a mosica que se fa agora. ¿En yes conscient?

Un poco. Más que más en ista zaguer anyada y meya, quan he prencipiau a producir bandas y a chent que ha veniu a escar-me me ascuita dende que tien ontze u dotze anyadas, por eixemplo. Ixo impresiona. Yo levo 25 anyadas cantando. Allora ye normal que en a zaguer etapa me haigan ascuitau bellas cheneracions.

Os albums d’Amparanoia yeran muito arriscaus. No bi heba miedo a decir cosa, a mezclar garra estilo, a entivocar-se, porque no bi heba cosa d’a que tener miedo. Creigo que sí que ixa epoca ye una referencia ta bandas que son trunfando como La Pegatina u Bongo Botrako, que ye a colla que producié, y que plenan estadios de chent superchoven. Ye muito bien, porque o mensache suyo ye muito bueno t’a chent choven.

Como has dito, en zagueras has produciu a collas como Bongo Botrako que son tenendo prou éxito. ¿Piensas continar en ixa endrecera de productora?

Quan decidié zarrar o ciclo d’Amparanoia, a ideya yera de tener tiempo ta fer atras cosas. Porque Amparanoia tenió muito exito a ran internacional y yo me foteba diez u ontze meses a l’anyo treballando. Muitas nueitz y cabos de semana difuera de casa y pensé que u recuperaba a vida mía u ya nomás feba isto.

Quereba fer cosas como la que he feito ista nueit y con Amparanoia yera cada vegada mas dificil porque viachabanos muita chent. Yo quereba, como diz Billy Holiday, “viachar lixera”. Ya no podeba prener decisions porque muita chen “minchaba” de yo. Ixe peso me cargó muito.

A ran mosical tamién me cansé de tanyer a las 3 tres u las quatre d’o maitín, de zarrar os festivals y as fiestas d’os lugars. Yo no sabeba guaire bien lo que quereba fer, pero sabeba que quereba fer atras cosas. Prencipié a escribir un libro que encara no ye editau, pero que talment se edite bell diya.

As collas estioron la que vinioron a escar-me a yo. En o caso de Bongo Botrako, Uri venió y me dició que teneba unos temas t’o segundo disco y que le fería goi que l’aduyase a rematar-los. L’aduyé y a la fin me proposó de fer-le a producción. Yo heba feito siempre as produccions d’Amparanoia y heba estau muito a soben en as produccions de muitos amigos.Ye un treballo que me fa goi y le dicié que sí.

Tamién a un artista que ye Venezolano que vive en Barcelona, que se diz Chamito, le hemos feito un disco repoliu que ye en momentos de surtir. Hemos gravau tamién a Muerdo, que ye un cantautor de Murcia muito intresant. Yera ell solo con a guitarra y hemos vistiu totz os temas con os mosicos que yo treballo por un regular, y ha quedau un treballo muito pincho.

Agora soi producindo lo que será o primer album de “La abuela Margarita” que ye tot un reto. Ella ye una muller maya, chamana, saputa, que charra y de rapincoté canta, y de bote y boleyo charra y dimpués canta y asinas asinas… Dar-le forma a tot ixo en un CD… buff… Ella quiere que le plegue a la chent choven asinas que somos metendo-ie bases electronicas. Ye un treballo muito intresant pero habré de fochar firme.

Me fa muito goi o treballo d’estudio y siento que puedo aduyar a la chent a viyer realizadas as suyas ideyas y que puedo enriquir-las. Con istas zaguers produccions he parau cuenta que sirvo, que lo puedo fer y que me fa goi. Alavez, prou que voi a continar con ista faina.

Ya me son clamando ta fer nuevos discos. Y prou que quiero. A mia principal faina ye a de dar. Prou que doi quan soi en o scenario, pero tamién doi a ixe zagal choven que plega con tres acordes y una letra y me diz “Aduya-me a fer qualcosa con isto”. L’aduyo a ell y a un fascal de chent que le siente. Ye un argüello esferent a lo d’as tuyas propias creacions, pero tamién ye muito poliu.

Fas concierto a los dos cantos de l’Atlantico, ¿qué diferencias trobas entre o publico americano y l’europeu?

Hemos estau ya mesmo en Nueva Zelanda…. En Latinoamerica nos adoran. Son muito fans y sientes muitismo a suya calor. Antimás siempre que tanyo en Latinoamerica bi ha belgas, alemans, espanyols… Paras cuenta de que quan fas un concierto en Archentina no tanyes so que t’archentinos. Bi ha chent de totz os puestos que va a viyer-te.

O publico de Latinoamerica ye muito fan, se lo sabe tot y lo cantan dende o minuto uno, u menos uno. A chent d’o publico europeu ye muito respetuosa. Le cal muita alegría. En que prencipia a sonar o ritmo, notas como se devantan. Les cal muita calor, les cal pasar-lo bien. Son muito feitos a artistas muito seriosos y yo… soi como soi.

Agora en Australia y Nueva Zelanda, yera aintro d’o festival Womad, de mosicas d’o mundo y o publico yera entregau de tot. Me sorprendió que bi hese tantos latinos y espanyols en primer ringlera.

 ¿Que mosica yes ascuitando agora?

A verdat ye que en os zaguer tiempos, como soi estada en l’estudio producindo a la chent, soi estada ascuitando os treballos que yera gravando. Quan no ascuitaba ixo, o zaguer trobo que he feito ye estau Sixo Rodríguez. Si no lo conoixer tos convido a fer-lo. Lo primer, miratz o documental que se diz “Searching a sugar man” que charra d’ell y d’a suya historia, que ye impresionant. Charra de l’apartheid, d’un artista que apareix y desapareix,… hetz de viyer-lo. Ye una historia fantastica.

A mia parella ye cubano y tamién ascuitamos muita mosica cubana que ye una traza de conectar con lo que deixó dezaga, con ixa alegría de vivir. Y cumbia, tamién en zagueras.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.