Ánchel Conte, a poesía 2.0

O poeta Ánchel Conte emplega Facebook ta publicar os suyos foto-poemas en aragonés, castellán y portugués

Ánchel Conte con o dispareixiu Félix Romeo

Ánchel Conte con o dispareixiu Félix Romeo

Un d’os grans poetas vivos de l’aragonés, Ánchel Conte, fa servir dende fa bellas semanas o rete social Facebook ta espardir os suyos zaguers poemas de dos anyos enta aquí. Polidas composicions de fotos y parolas creyan un corpus poetico sobreintresant que amuestran a sensibilidat y estilo de Conte, que publiqué o suyo primer poemario en 1972 con un tetulo que encara ye valido “No deixetz morir a mia voz”.

Dende a pachina “Queremos más obras de Ánchel Conte” o poeta fa istas composicions que amás, arrocegan buena ripa de comentarios d’os suyos lectors que agradixen la tornada a l’actividat literaria de Conte. Pero, por qué fer servir Facebook t’amostrar o triballo d’os zaguers dos anyos? O propio Ánchel Conte mos diz que tien “una pallada de poemas escritos en os dos zaguers anyos“, y encara que se piensa de publicar-los en formato paper “escribir en internet ye con a idea de que l’aragonés plegue a totz os puestos, cosa que no fan os libros“.

Tamién o formato ye una mica esferent, as poesias que ye publicando van alcompanyadas de imachens, porque, mos esplanica Ánchel Conte, “as fotos son siempre una alegoría d’o poema e ye una manera tamién de gritar l’atención“.

O zaguer libro publicau d’Ánchel Conte estió “De Ordo Sacerdotalis” en 2004, encara que en 2004 se tradució enta o ruso y en 2007 ta l’espanyol y o francés “Aguardando lo cierzo” que s’heba publicau en aragonés en 2002 y que estió premio Ciudat de Balbastro.

Cosa millor que amostrar o triballo de Conte a traviés d’un d’os suyos zaguers poemas, publicau, como os atros, en ista pachina de Facebook.

IXO ASPERABA

Espullau sobre o leito pensabe vier-te espullau á o mío canto
… entre que o tiempo adormiba en toz os reloches
e yo esdevenibe fumo leve entre os tuyos brazos

aquí hebe parau campos d’amor an que perder-nos lueñes de tot
amparaus per a a nueit protechius per ánchels dende alto

n’una perpetua albada

tu e yo en soledat amando-nos

¡Ixo asperaba!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.