Antonio Suárez apuesta por “racionalizar y simplificar l’Administración”

O consellero de Politica Territorial y Interior d'o Gubierno d'Aragón ha explicau totz os suyos plans t'a reforma de l'Administración en territorio aragonés

suarezDende fa meses, o Gubierno d’Aragón acaza incansablement una meta complicada d’aconseguir: que no existan duplicidatz entre as diferents Administracions publicas que componen o teixiu aragonés. Obtener una mayor eficiencia y distinguir clarament o treballo de municipios, comarcas, provincias y autonomía ye un d’os mayors retos d’Antonio Suárez, consellero de Politica Territorial y Interior. Una meta que ha tornau a deixar clara en a suya intervención en a Ponencia Especial que estudea a racionalización y simplificación de l’Administración Publica Aragonesa: “Ta aconsiguir una mayor eficacia y eficiencia en a chestión d’as Administracions Locals, cal un gran alcuerdo politico con a participación de totz”, ha desvelau.

Ta Suárez, brenca partidario d’eliminar comarcas u mancomunidatz, o punto de partida be d’estar siempre o modelo territorial que Aragón leva fendo servir mientres anyos, pero con un chicot matiz: eliminar duplicidatz que, a día de hue, existen practicament en todas as escalas. Como eixemplo, puede fer honra o que se columbra cada verano: o servicio de bombers en as comarcas. “Cal establir clarament, no nomás as competencias, soque os mecanismos de coordinación entre Administracions” y cal “introducir mecanismos de guarancia de que as Administracions Locals se van a adedicar a exercer as competencias que les corresponden por meyo d’os consiguients mecanismos de financiación”, ha asegurau.

Por parte d’os municipios, Suárez ha confirmau que han de “tener autonomía” ta prener as suyas propias decisions, parando siempre cuenta en o que viene contemplau en a Lei de Bases de Rechimen Local. Caso que un municipio no pueda cumplir con a suya misión, dende Interior apuestan por “demandar a dispensa de qualques servicios, asociar-se-ne con atros, delegar-los u convenir-los con as comarcas u demandar a cooperación provincial”. Como refirme tienen a las comarcas, que en l’actualidat s’entienden como prestadoras de servicios con funcions transferidas que cuestan 83,5 millons d’euros. Amás d’ista cantidat, mientres o 2010 gastoron 27,5 millons en qüestions que no yeran d’a suya competencia.

A día de hue, s’entiende que as comarcas tienen poders sobre materias como Acción Social, Choventut y Esportes y tractamiento de repuis, encara que Suárez les atorgaría competencias en materia cultural y Protección Civil, que ye responsabilidat d’as Diputacions y d’o Gubierno d’Aragón. En Turismo, as comarcas habrían d’adedicar-se a la promoción d’a ufierta turistica d’a redolada, mientres que o Gubierno d’Aragón habría d’estar competent en l’exercicio d’as potestatz autorizatoria, rechistral, inspectora y disciplinaria sobre as interpresas y estableiximientos turisticos.

Amás d’asegurar d’una vegada a desaparición d’as duplicidatz, dende Interior tienen dos chicotz problemas mas relacionaus dreitament con iste tema: reducir o numero de consellers comarcals y creyar a denominada ‘Comarca 33’, en que se regularía o rechimen especifico d’a ciudat de Zaragoza y a prestación de servicios comuns.

Fuent: http://www.aragon2.net/n-20503-2-Antonio_Suarez_apuesta_racionalizar_simplificar_Administracion

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.